Túrkistan qalasynyń jastar resýrstyq ortalyǵynyń alańynda QR Qarýly kúshteri qataryna 40 jas óren men UQK Shekara qyzmetiniń shekti komandasy qataryna 30 jigitti saltanatty túrde shyǵaryp salý rásimi uiymdastyryldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Is-sharaǵa áskeri sala men soǵys qimyldaryna qatysqan ardagerler, jas sarbazdardyń týystary men jaqyndary, «Jas sarbaz» áskeri-patriottyq qozǵalysynyń tárbielenýshileri qatysty.
Saltanatty sharada Túrkistan oblysy ákiminiń orynbasary Ertai Altaev áskerdegi qyzmet – árbir azamattyń qasietti boryshy jáne árbir qazaqstandyq otbasynyń tynyshtyǵynyń kepili ekenin atap ótti, sondai-aq jas sarbazdar býynyna sáttilik tiledi.
Sondai-aq, Qarýly Kúshter ardagerleri oblystyq keńesiniń tóraǵasy zapastaǵy podpolkovnik Babai Aldabergenov áskerge shaqyrylýshylarǵa aq jol tilep, eldiń qaýipsizdigin saqtaý onyń árbir azamatynyń asa mańyzdy mindeti ekenin atap ótti.
Qorǵanys isteri departamenti bastyǵynyń orynbasary podpolkovnik Jandos Kúlderbaevtyń aitýynsha, búgingi kúni UQK Shekara qyzmetine kúzgi shaqyrý josparyna sáikes oblystan meditsinalyq jáne psihologiialyq komissiiadan ótken 300-den astam áskerge shaqyrylýshy jiberildi. Budan basqa, búginnen bastap Qarýly Kúshter qataryna áskerge shaqyrý jasyndaǵy 1000-nan astam azamat shaqyrylady. Al kúzgi shaqyrý naýqany osy jyldyń 31 jeltoqsanyna deiin jalǵasady.
Shaqyrý naýqanynyń josparyna sáikes birinshi kezekte UQK Shekara qyzmetiniń bólimsheleri, Memlekettik kúzet qyzmeti, sodan keiin Qarýly Kúshterdiń áskeri bólimderi, Tótenshe jaǵdailar ministrligi men Qazaqstan Respýblikasy Ulttyq ulany jasaqtalatynyn atap ótken jón. Al tórt aidyń ishinde Túrkistan oblysynan 18-27 jas aralyǵyndaǵy 2500-den astam azamat ásker qataryna shaqyrylady.
