Qazaqtyń júregine jol taýyp, qoǵamǵa erekshe áser etken maqalany Túrkistan jurtshylyǵy óte jyly qabyldady. Túrkistan qalasyndaǵy Qoja Ahmet Iasaýi atyndaǵy halyqaralyq qazaq-túrik ýniversitetiniń mýzeiinde erekshe formatta jiynda oqytýshylar men stýdentter, ǵalymdar men sarapshylar bul maqalanyń el sanasyn silkindiretinin atap ótti.
Erekshe formatta deitin sebebimiz, bul jiyn ádettegidei bir kabinette emes, mýzeide uiymdastyryldy.
Oqytýshylar men stýdentter tarihi jádigerlerdi aralap júrip, pikir almasty. Jiynda ýniversitet dotsenti Liazzat Dinasheva oqý ordasynyń mýzeiinde Elbasynyń «Uly dalanyń jeti qyry» maqalasynda aitylǵan dúnieler bar ekenine toqtalyp, kelýshilerdi tarihi jádigerlermen tanystyrdy. Máselen, Uly dalanyń uly esimderi, tutas Túrki áleminiń ǵulamasy —Iasaýi babamyz týraly qundy málimetter kópshilikti qyzyqtyratyny sózsiz.
Ýniversitet oqytýshylary Elbasy Túrkistan qalasyn Túrki áleminiń genezisi retinde damytyp, onyń halyqaralyq arenadaǵy bedelin júieli túrde arttyrý baǵytyndaǵy oilary kieli shaharǵa tyń serpin beretinin aitty. Al, «Arhiv-2025» baǵdarlamasy negizinde ýniversitettegi zertteý jumystary odan saiy jandana túspek.
Maqaladaǵy keleli máselelerdi jeke-jeke taldaǵan qatysýshylar Elbasynyń bul qundy dúniesi Túrkistan oblysy men Túrkistan qalasyn damytatynyn, ondaǵy bastamalar ǵylym men mádeniettiń damýyna úlken serpin beretinin jetkizdi. Aldaǵy ýaqytta osy irgeli oqý ordasynda ǵylymi zertteýler men qazaq órkenietin tanytatyn úlken jobalar qolǵa alynady degen jospar bar.
