قازاقتىڭ جۇرەگىنە جول تاۋىپ، قوعامعا ەرەكشە اسەر ەتكەن ماقالانى تۇركىستان جۇرتشىلىعى وتە جىلى قابىلدادى. تۇركىستان قالاسىنداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ مۋزەيىندە ەرەكشە فورماتتا جيىندا وقىتۋشىلار مەن ستۋدەنتتەر، عالىمدار مەن ساراپشىلار بۇل ماقالانىڭ ەل ساناسىن سىلكىندىرەتىنىن اتاپ ءوتتى.
ەرەكشە فورماتتا دەيتىن سەبەبىمىز، بۇل جيىن ادەتتەگىدەي ءبىر كابينەتتە ەمەس، مۋزەيدە ۇيىمداستىرىلدى.
وقىتۋشىلار مەن ستۋدەنتتەر تاريحي جادىگەرلەردى ارالاپ ءجۇرىپ، پىكىر الماستى. جيىندا ۋنيۆەرسيتەت دوسەنتى لياززات ديناشيەۆا وقۋ ورداسىنىڭ مۋزەيىندە ەلباسىنىڭ «ۇلى دالانىڭ جەتى قىرى» ماقالاسىندا ايتىلعان دۇنيەلەر بار ەكەنىنە توقتالىپ، كەلۋشىلەردى تاريحي جادىگەرلەرمەن تانىستىردى. ماسەلەن، ۇلى دالانىڭ ۇلى ەسىمدەرى، تۇتاس تۇركى الەمىنىڭ عۇلاماسى —ياساۋي بابامىز تۋرالى قۇندى مالىمەتتەر كوپشىلىكتى قىزىقتىراتىنى ءسوزسىز.
ۋنيۆەرسيتەت وقىتۋشىلارى ەلباسى تۇركىستان قالاسىن تۇركى الەمىنىڭ گەنەزيسى رەتىندە دامىتىپ، ونىڭ حالىقارالىق ارەناداعى بەدەلىن جۇيەلى تۇردە ارتتىرۋ باعىتىنداعى ويلارى كيەلى شاھارعا تىڭ سەرپىن بەرەتىنىن ايتتى. ال، «ارحيۆ-2025» باعدارلاماسى نەگىزىندە ۋنيۆەرسيتەتتەگى زەرتتەۋ جۇمىستارى ودان سايى جاندانا تۇسپەك.
ماقالاداعى كەلەلى ماسەلەلەردى جەكە-جەكە تالداعان قاتىسۋشىلار ەلباسىنىڭ بۇل قۇندى دۇنيەسى تۇركىستان وبلىسى مەن تۇركىستان قالاسىن دامىتاتىنىن، ونداعى باستامالار عىلىم مەن مادەنيەتتىڭ دامۋىنا ۇلكەن سەرپىن بەرەتىنىن جەتكىزدى. الداعى ۋاقىتتا وسى ىرگەلى وقۋ ورداسىندا عىلىمي زەرتتەۋلەر مەن قازاق وركەنيەتىن تانىتاتىن ۇلكەن جوبالار قولعا الىنادى دەگەن جوسپار بار.
