Ońtústiktegi 45-50 gradýs ystyqta bir tamshy sý ishpegen qaýyndar dámdi ári úlken bolyp ósken. Sharýalardyń sózinshe, aýyl sharýashylyǵyndaǵy bul tásildi ata-babalarymyz buryn da qoldanǵan.
– Jyldan-jylǵa aǵyn sý máselesi kúrdelenip keledi. Sondyqtan burynǵy ata-babalarymyzdyń úiretken tájiribesin jasap kórýge bel býdym. Kóktemniń alǵashqy ailarynda sýarmaly sý eshkimge kerek emes kezder bolady. Sol aqpan aiynyń basynda egistik alqabymdy ábden sýaryp, sý sińdirip aldym. Sodan qaýyn ektim. Shilde aiyndaǵy 45-50 gradýs ystyqta da sý bergen joqpyn. 120 kún sý ishpedi. Nátijesinde qaýyndarym jaqsy ónim berdi. Dámdi boldy, – deidi sharýa Azizhan Egemberdiev.
Sharýa Qarnaq aýylynda turady. Onyń aýyl mańyndaǵy jer ýchaskesinde egistikke arnalǵan jeri bar. Biyl sonyń 4 gektaryna qaýyn, 1 gektaryna qarbyz ekken. Nápaqasyn jer-anadan izdegen sharýa jinaǵan ónimin jergilikti jerde saýdaǵa shyǵarǵan. Dámdi qaýyndy tutynýshylar da kóp bolypty.
Onyń aitýynsha, bul tásildi kez kelgen qaýynnyń sortyna paidalana berýge bolady. Tek jer tyń bolýy qajet. Endi sharýa aldaǵy jyldary egistik alqabyn ulǵaitýdy josparlap otyr. Qaýynnan mol ónim alyp jatsa, shet elge alyp baryp satý da oiynda bar.
