Túrkistan oblysynyń turǵyny, 72 jastaǵy qadirmendi qariia Joldasbek Turmanbetov Almaty oblystyq Qazaqstan halqy Assambleiasy janyndaǵy Aqsaqaldar keńesiniń «Batagói» respýblikalyq baiqaýynda júldeli úshinshi oryndy ielendi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Atalǵan shara Almaty oblystyq Qazaqstan halqy Assambleiasy janyndaǵy Aqsaqaldar keńesi men «Almaty oblysynyń ishki saiasat basqarmasy» MM «Qoǵamdyq kelisim jáne damý ortalyǵy» KMM-niń qoldaýymen uiymdastyryldy.
Baiqaýdyń maqsaty – etnomádeni dástúrlerimizdi jańǵyrtý, nasihattaý arqyly ulttyq bolmysymyzdy bekemdeý. Sonymen qatar qoǵamda aqsaqaldar institýtynyń rólin kúsheitý, jas urpaqqa halqymyzdyń baǵa jetpes bai salt-dástúrin sińirý, batanyń qadir-qasietin túsindirý.
Baiqaý 3 kezeń boiynsha ótkizildi. 1-kezeńde baiqaýǵa qatysýshy aqsaqaldar nemerelerimen ózderin tanystyra otyryp, kezektese ózderi shyǵarǵan bata berý ónerin kórsetti. Aldymen aqsaqal batany bastap, nemeresi sol batany jalǵastyrdy. 2-kezeńde aqsaqaldar ekranǵa shyqqan ulttyq salt-dástúr túrlerine orai qol jaiyp, bata qaiyrady.
Al 3-kezeńde qatysýshylar baiqaýdy aiaqtaityn qorytyndy batany usyndy. Bul bata jarysty qorytyndylap, qatysýshylar men kórermenderge arnaldy. Batanyń mazmuny, onyń qorytyndy máni jáne áserliligi baǵalandy.
Jeńimpazdar arnaiy diplomdarmen jáne aqshalai syilyqtarmen marapattaldy.
Aita ketsek, respýblikalyq baiqaýda abyroi biiginen kóringen jerlesimiz Joldasbek Múbarakuly aqsaqal Arys, Kentaý qalalarynda nemis tili pániniń muǵalimi, áskeri jetekshi qyzmetterin abyroimen atqarǵan. 1982 jyldyń qyrkúiek aiynan 2014 jyldyń qarasha aiyna deiin Arys qalasy Aqdala aýylyndaǵy S.Erýbaev atyndaǵy orta mektebinde nemis tili páni muǵalimi, áskeri jetekshi, direktordyń tárbie isin atqaryp, 2014 jyly zeinetkerlikke shyǵady. 2014-2017 jyldary Arys qalalyq ardagerler keńesiniń hatshysy qyzmetterin atqarǵan.
2017 jyly batagói qariialardyń oblystyq baiqaýyna qatysyp bas júldeni jeńip alsa, 2019 jyly Taldyqorǵan qalasynda ótken batagói qariialardyń respýblikalyq baiqaýynda júldeli úshinshi oryndy ielenip, oblystyń namysyn qorǵady.
Batagói qariia ardagerler keńesi janynan «Ardager» atty ansambl quryp, sol ansamblge jetekshilik etedi.
