تۇركىستان وبلىسىنىڭ تۇرعىنى، 72 جاستاعى قادىرمەندى قاريا جولداسبەك تۇرمانبەتوۆ الماتى وبلىستىق قازاقستان حالقى اسسامبلەياسى جانىنداعى اقساقالدار كەڭەسىنىڭ «باتاگوي» رەسپۋبليكالىق بايقاۋىندا جۇلدەلى ءۇشىنشى ورىندى يەلەندى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

اتالعان شارا الماتى وبلىستىق قازاقستان حالقى اسسامبلەياسى جانىنداعى اقساقالدار كەڭەسى مەن «الماتى وبلىسىنىڭ ىشكى ساياسات باسقارماسى» مم «قوعامدىق كەلىسىم جانە دامۋ ورتالىعى» كمم-نىڭ قولداۋىمەن ۇيىمداستىرىلدى.

بايقاۋدىڭ ماقساتى –  ەتنومادەني داستۇرلەرىمىزدى جاڭعىرتۋ، ناسيحاتتاۋ ارقىلى ۇلتتىق بولمىسىمىزدى بەكەمدەۋ. سونىمەن قاتار قوعامدا اقساقالدار ينستيتۋتىنىڭ ءرولىن كۇشەيتۋ، جاس ۇرپاققا حالقىمىزدىڭ باعا جەتپەس باي ءسالت-داستۇرىن ءسىڭىرۋ، باتانىڭ قادىر-قاسيەتىن ءتۇسىندىرۋ.

بايقاۋ 3 كەزەڭ بويىنشا وتكىزىلدى. 1-كەزەڭدە بايقاۋعا قاتىسۋشى اقساقالدار نەمەرەلەرىمەن وزدەرىن تانىستىرا وتىرىپ، كەزەكتەسە وزدەرى شىعارعان باتا بەرۋ ونەرىن كورسەتتى. الدىمەن اقساقال باتانى باستاپ، نەمەرەسى سول باتانى جالعاستىردى. 2-كەزەڭدە اقساقالدار ەكرانعا شىققان ۇلتتىق ءسالت-داستۇر تۇرلەرىنە وراي قول جايىپ، باتا قايىرادى. 

ال 3-كەزەڭدە قاتىسۋشىلار بايقاۋدى اياقتايتىن قورىتىندى باتانى ۇسىندى. بۇل باتا جارىستى قورىتىندىلاپ، قاتىسۋشىلار مەن كورەرمەندەرگە ارنالدى. باتانىڭ مازمۇنى، ونىڭ قورىتىندى ءمانى جانە اسەرلىلىگى باعالاندى.

جەڭىمپازدار ارنايى ديپلومدارمەن جانە اقشالاي سىيلىقتارمەن ماراپاتتالدى.

ايتا كەتسەك، رەسپۋبليكالىق بايقاۋدا ابىروي بيىگىنەن كورىنگەن جەرلەسىمىز جولداسبەك مۇباراك ۇلى اقساقال ارىس، كەنتاۋ قالالارىندا نەمىس ءتىلى ءپانىنىڭ ءمۇعالىمى، اسكەري جەتەكشى قىزمەتتەرىن ابىرويمەن اتقارعان. 1982 جىلدىڭ قىركۇيەك ايىنان 2014 جىلدىڭ قاراشا ايىنا دەيىن ارىس قالاسى اقدالا اۋىلىنداعى س.ەرۋبايەۆ اتىنداعى ورتا مەكتەبىندە نەمىس ءتىلى ءپانى ءمۇعالىمى، اسكەري جەتەكشى، ديرەكتوردىڭ تاربيە ءىسىن اتقارىپ، 2014 جىلى زەينەتكەرلىككە شىعادى. 2014-2017 جىلدارى ارىس قالالىق ارداگەرلەر كەڭەسىنىڭ حاتشىسى قىزمەتتەرىن اتقارعان.

2017 جىلى باتاگوي قاريالاردىڭ وبلىستىق بايقاۋىنا قاتىسىپ باس جۇلدەنى جەڭىپ السا، 2019 جىلى تالدىقورعان قالاسىندا وتكەن باتاگوي قاريالاردىڭ رەسپۋبليكالىق بايقاۋىندا جۇلدەلى ءۇشىنشى ورىندى يەلەنىپ، وبلىستىڭ نامىسىن قورعادى.

باتاگوي قاريا ارداگەرلەر كەڭەسى جانىنان «ارداگەر» اتتى انسامبل قۇرىپ، سول انسامبلگە جەتەكشىلىك ەتەدى.