Túrkistanda «Ónerli ólke» oblystyq óner festivali aiasyndaǵy Ordabasy aýdanynyń mádeniet kúnderi jalǵasyp jatyr, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Búgin Etnoaýylda ulttyq qundylyqtar nasihattalyp, sport túrlerinen saiys ótkizildi. Is-sharany tamashalaýǵa kelgen túrkistandyq 74 jastaǵy qariia 45 kelilik bóreneni on ret kóterip, dúiim jurtty tańǵaldyrdy.
Sonymen qatar arqan tartý, qazaqsha kúres, qol kúres, asyq atý, qoshqar kóterý, láńgi tebý sekildi ulttyq oiyndar dáripteldi. Belsene atsalysyp, jeńip shyqqan qatysýshylar marapattaldy.
Shara barysynda aýyl sharýashylyq jáne kásipkerlik salalarynyń kórsetkishi men ónimderinen jáne «Ordabasy tartýlary» atty ulttyq taǵam kórmesi, qolóner sheberleriniń kórmesi kópshilik nazaryna usynyldy.
«Temirlan» halyq teatry men «Jas tolqyn» balalar men jasóspirimder teatry Altybaqan mańynda «Aq súiek» teatrlandyrylǵan qoiylymyn pash etti. Ordabasy aýdandyq mádeniet úii janynan qurylǵan «Ordabasy» folklorlyq halyq ansambliniń áýezdi ánderi men dala sarynyna ainalǵan kúileri rýhani-mádeni sharanyń sánin keltirdi.
Keshkisin «Kerýen sarai» týristik kesheninde 19:00-21:00 aralyǵynda Erkin Nurjanov, Janel Nurjanova, Asqar Júnisbekov, Asqar Qalmyrza syndy tanymal óner sheberleriniń qatysýymen «Ordabasy – qut mekenim» gala-kontserti ótedi.
