تۇركىستاندا «ونەرلى ولكە» وبلىستىق ونەر فەستيۆالى اياسىنداعى ورداباسى اۋدانىنىڭ مادەنيەت كۇندەرى جالعاسىپ جاتىر، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇگىن ەتنواۋىلدا ۇلتتىق قۇندىلىقتار ناسيحاتتالىپ، سپورت تۇرلەرىنەن سايىس وتكىزىلدى. ءىس-شارانى تاماشالاۋعا كەلگەن تۇركىستاندىق 74 جاستاعى قاريا 45 كەلىلىك بورەنەنى ون رەت كوتەرىپ، ءدۇيىم جۇرتتى تاڭعالدىردى.
سونىمەن قاتار ارقان تارتۋ، قازاقشا كۇرەس، قول كۇرەس، اسىق اتۋ، قوشقار كوتەرۋ، لاڭگى تەبۋ سەكىلدى ۇلتتىق ويىندار دارىپتەلدى. بەلسەنە اتسالىسىپ، جەڭىپ شىققان قاتىسۋشىلار ماراپاتتالدى.
شارا بارىسىندا اۋىل شارۋاشىلىق جانە كاسىپكەرلىك سالالارىنىڭ كورسەتكىشى مەن ونىمدەرىنەن جانە «ورداباسى تارتۋلارى» اتتى ۇلتتىق تاعام كورمەسى، قولونەر شەبەرلەرىنىڭ كورمەسى كوپشىلىك نازارىنا ۇسىنىلدى.
«تەمىرلان» حالىق تەاترى مەن «جاس تولقىن» بالالار مەن جاسوسپىرىمدەر تەاترى التىباقان ماڭىندا «اق سۇيەك» تەاترلاندىرىلعان قويىلىمىن پاش ەتتى. ورداباسى اۋداندىق مادەنيەت ءۇيى جانىنان قۇرىلعان «ورداباسى» فولكلورلىق حالىق ءانسامبلىنىڭ اۋەزدى اندەرى مەن دالا سارىنىنا اينالعان كۇيلەرى رۋحاني-مادەني شارانىڭ ءسانىن كەلتىردى.
كەشكىسىن «كەرۋەن ساراي» تۋريستىك كەشەنىندە 19:00-21:00 ارالىعىندا ەركىن نۇرجانوۆ، جانەل نۇرجانوۆا، اسقار جۇنىسبەكوۆ، اسقار قالمىرزا سىندى تانىمال ونەر شەبەرلەرىنىڭ قاتىسۋىمەن «ورداباسى – قۇت مەكەنىم» گالا-كونسەرتى وتەدى.
