Túrkistan qalasyn halyqaralyq talapqa sai qolóner ortalyǵyna ainaldyrý baǵytyndaǵy jumystar bastaldy. Onyń alǵysharty retinde shaharda «Qolónershiler ortalyǵynyń» ǵimaraty salynyp jatyr, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Aldaǵy ýaqytta Túrkistannyń brendine ainalatyn buiymdar shyǵarylyp, naryqqa enedi dep kútilýde. Túrkistan oblysynyń ákimi Darhan Satybaldy osy baǵyttaǵy jumystardy júieleý úshin qolónershiler men sala mamandarymen, týrizm ókilderimen keńes ótkizdi. Jiynda qolóner salasyndaǵy ózekti máseleler talqylanyp, usynystar berildi.
– Qolónerdi damytýǵa óz tarapymnan, ákimdik tarapymnan tolyq qoldaý kórsetiledi. Ónim shyǵarýǵa qajetti qurylǵylardy alyp berýge de daiynbyz. Biraq bizge naqty jospar qajet. Qolónershiler de ózderine mindetteme alyp, qansha buiym shyǵaratynyn josparlaýlary tiis.
Sheberlerimizdi tájiribe jinap, úirenýleri úshin shetelge, elimizdiń ózge óńirlerine jibergen jón. Sheteldegi qandastarymyzdyń arasyndaǵy qolóner sheberlerin de arnaiy shaqyryp, qoldaý kórsetýge niettimiz. Qazaqtyń mádenieti, Túrkistannyń tarihy qolóneri arqyly da dáriptelip, týrizm men mádeniet salasynyń bir bóligine ainalyp, jańa jumys oryndaryn ashýǵa da yqpal etýi kerek dep esepteimin, – dedi Darhan Satybaldy.
Jiynda Almaty men oblys aýmaqtarynan arnaiy kelgen qolóner sheberleri óz usynystary men pikirlerin aitty. Ónerdiń osy salasyna qoldaý kórsetken oblys basshylyǵyna alǵystaryn jetkizip, birlese jumys isteýge daiyn ekenderin bildirdi.
Túrkistan oblystyq týrizm basqarmasynyń basshysy Nurdáýlet Medeýov oblys ákiminiń tapsyrmasymen ázirlengen qolónerdi damytý baǵytyndaǵy josparlarǵa toqtaldy. Alǵashqy kezekte oblystaǵy sheberlerdiń tizimi jinaqtalyp, 144 qolónershi qyzmet atqaratyny anyqtalǵan.
Oblysta qolóner ortalyǵyn damytý arqyly sheberlerediń óndirisin qalyptastyrý kózdelip otyr. Qolónershilerdiń ónimderin satý jáne ony naryqqa jyljytý, týristik biznes ókilderimen seriktestik ornatý arqyly jańa týristik ónimder qalyptaspaq.
Oblystan jinaqtalǵan málimetter men sheberlerdiń ónimderin taldaý nátijesinde toqyma, kiiz basý, quraq quraý jáne keste tigý, zergerlik ónimder, aǵash jáne súiekten buiym jasaý óneri basym baǵyttar ekeni anyqtaldy. Dástúrli qolónershilerdi zertteý, taldaý jumystarynyń nátijesimen Túrkistan qalasyndaǵy «Qolóner ortalyǵynda» «Qazaq-Oner» sheberler ortalyǵyn qurý kózdelgen. Sheberler ortalyǵy shoý-rým, sheberhanalar men foto aimaqtardy qamtidy. Qolóner sheberleri tek ónim daiyndaýmen ainalysady.
Ónimderdi satý shoý-rýmda arnaiy jaýapty adamdarmen júzege asyrylady. Ónimderdi satý maqsatynda arnaiy mamandarmen marketingtik josparlar ázirlenedi. Bul bastama qolóner salasynyń damýyna yqpal etedi jáne qolónershilerdiń kásibin órkendetýge jaǵdai jasaidy dep kútilip otyr. «Qolóner ortalyǵynda» týrizmdi damytýǵa baǵyttalǵan jumystar da atqarylady. Qazaq qolóneri, mádenieti men ulttyq taǵamdary, kiimderi de dáripteledi.
