تۇركىستان قالاسىن حالىقارالىق تالاپقا ساي قولونەر ورتالىعىنا اينالدىرۋ باعىتىنداعى جۇمىستار باستالدى. ونىڭ العىشارتى رەتىندە شاھاردا «قولونەرشىلەر ورتالىعىنىڭ» عيماراتى سالىنىپ جاتىر، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
الداعى ۋاقىتتا تۇركىستاننىڭ برەندىنە اينالاتىن بۇيىمدار شىعارىلىپ، نارىققا ەنەدى دەپ كۇتىلۋدە. تۇركىستان وبلىسىنىڭ اكىمى دارحان ساتىبالدى وسى باعىتتاعى جۇمىستاردى جۇيەلەۋ ءۇشىن قولونەرشىلەر مەن سالا ماماندارىمەن، تۋريزم وكىلدەرىمەن كەڭەس وتكىزدى. جيىندا قولونەر سالاسىنداعى وزەكتى ماسەلەلەر تالقىلانىپ، ۇسىنىستار بەرىلدى.
– قولونەردى دامىتۋعا ءوز تاراپىمنان، اكىمدىك تاراپىمنان تولىق قولداۋ كورسەتىلەدى. ءونىم شىعارۋعا قاجەتتى قۇرىلعىلاردى الىپ بەرۋگە دە دايىنبىز. ءبىراق بىزگە ناقتى جوسپار قاجەت. قولونەرشىلەر دە وزدەرىنە مىندەتتەمە الىپ، قانشا بۇيىم شىعاراتىنىن جوسپارلاۋلارى ءتيىس.
شەبەرلەرىمىزدى تاجىريبە جيناپ، ۇيرەنۋلەرى ءۇشىن شەتەلگە، ەلىمىزدىڭ وزگە وڭىرلەرىنە جىبەرگەن ءجون. شەتەلدەگى قانداستارىمىزدىڭ اراسىنداعى قولونەر شەبەرلەرىن دە ارنايى شاقىرىپ، قولداۋ كورسەتۋگە نيەتتىمىز. قازاقتىڭ مادەنيەتى، تۇركىستاننىڭ تاريحى قولونەرى ارقىلى دا دارىپتەلىپ، تۋريزم مەن مادەنيەت سالاسىنىڭ ءبىر بولىگىنە اينالىپ، جاڭا جۇمىس ورىندارىن اشۋعا دا ىقپال ەتۋى كەرەك دەپ ەسەپتەيمىن، – دەدى دارحان ساتىبالدى.
جيىندا الماتى مەن وبلىس اۋماقتارىنان ارنايى كەلگەن قولونەر شەبەرلەرى ءوز ۇسىنىستارى مەن پىكىرلەرىن ايتتى. ونەردىڭ وسى سالاسىنا قولداۋ كورسەتكەن وبلىس باسشىلىعىنا العىستارىن جەتكىزىپ، بىرلەسە جۇمىس ىستەۋگە دايىن ەكەندەرىن ءبىلدىردى.
تۇركىستان وبلىستىق تۋريزم باسقارماسىنىڭ باسشىسى نۇرداۋلەت مەدەۋوۆ وبلىس اكىمىنىڭ تاپسىرماسىمەن ازىرلەنگەن قولونەردى دامىتۋ باعىتىنداعى جوسپارلارعا توقتالدى. العاشقى كەزەكتە وبلىستاعى شەبەرلەردىڭ ءتىزىمى جيناقتالىپ، 144 قولونەرشى قىزمەت اتقاراتىنى انىقتالعان.
وبلىستا قولونەر ورتالىعىن دامىتۋ ارقىلى شەبەرلەرەدىڭ ءوندىرىسىن قالىپتاستىرۋ كوزدەلىپ وتىر. قولونەرشىلەردىڭ ونىمدەرىن ساتۋ جانە ونى نارىققا جىلجىتۋ، تۋريستىك بيزنەس وكىلدەرىمەن سەرىكتەستىك ورناتۋ ارقىلى جاڭا تۋريستىك ونىمدەر قالىپتاسپاق.
وبلىستان جيناقتالعان مالىمەتتەر مەن شەبەرلەردىڭ ونىمدەرىن تالداۋ ناتيجەسىندە توقىما، كيىز باسۋ، قۇراق قۇراۋ جانە كەستە تىگۋ، زەرگەرلىك ونىمدەر، اعاش جانە سۇيەكتەن بۇيىم جاساۋ ونەرى باسىم باعىتتار ەكەنى انىقتالدى. ءداستۇرلى قولونەرشىلەردى زەرتتەۋ، تالداۋ جۇمىستارىنىڭ ناتيجەسىمەن تۇركىستان قالاسىنداعى «قولونەر ورتالىعىندا» «Qazaq-Oner» شەبەرلەر ورتالىعىن قۇرۋ كوزدەلگەن. شەبەرلەر ورتالىعى شوۋ-رۋم، شەبەرحانالار مەن فوتو ايماقتاردى قامتيدى. قولونەر شەبەرلەرى تەك ءونىم دايىنداۋمەن اينالىسادى.
ونىمدەردى ساتۋ شوۋ-رۋمدا ارنايى جاۋاپتى ادامدارمەن جۇزەگە اسىرىلادى. ونىمدەردى ساتۋ ماقساتىندا ارنايى ماماندارمەن ماركەتينگتىك جوسپارلار ازىرلەنەدى. بۇل باستاما قولونەر سالاسىنىڭ دامۋىنا ىقپال ەتەدى جانە قولونەرشىلەردىڭ كاسىبىن وركەندەتۋگە جاعداي جاسايدى دەپ كۇتىلىپ وتىر. «قولونەر ورتالىعىندا» ءتۋريزمدى دامىتۋعا باعىتتالعان جۇمىستار دا اتقارىلادى. قازاق قولونەرى، مادەنيەتى مەن ۇلتتىق تاعامدارى، كيىمدەرى دە دارىپتەلەدى.
