Atalmysh sharaǵa Túrkistan oblystyq Qoǵamdyq damý basqarmasynyń basshysy Damir Júnisov, oblystyq Aqsaqaldar alqasynyń tóraǵasy Jarylqasyn Áziretbergenov jáne jaýapty salalyq basqarma basshylary men aýdan, qalalardyń Túrkistan qalasyn abattandyrýǵa jáne belgilengen sektorlarǵa jaýapty mamandary qatysty.
Jiynda alǵash bolyp sóz alǵan Qoǵamdyq damý basqarmasynyń basshysy Damir Júnisov oblys ákimi Ó.Shókeevtiń Túrkistan qalasyn kógaldandyrý boiynsha tapsyrmasyna sáikes tiisti jumystar óz dárejesinde atqarylyp jatqandyǵyn aitty.
– Biz oblystyq Aqsaqaldar alqasymen birlese otyryp Túrkistan qalasyndaǵy 9 móltek aýdandaǵy 850 kóshe boiyna egilgen aǵash kóshetteriniń ósip shyǵýy úshin, olardy kútip-baptaý jumystaryna oblys aqsaqaldar alqasy men jergilikti turǵyndardy tartý máselesin qolǵa alyp otyrmyz. Qazirgi tańda Túrkistan qalasy 32 sektorǵa bólingen. Ár aýmaqqa aýdan, qala ákimdikteri men basqarma basshylary jaýapty retinde belgilengen.
Shahardaǵy «Jasyl beldeý» aimaǵyndaǵy kóshetterdiń sýarylýy basty nazardaǵy másele bolyp otyr. Osy maqsatta sektor aýmaǵynda uńǵymalar qazylyp, jerasty sýlary paidalanýda. Ár sektorda 10 myńǵa jýyq kóshetter otyrǵyzylyp, ár taldyń túbine sý jetkizilýde. Kei sektorda tamshylatyp sýarý júiesi júrgizilse, kei sektorlar qajetti sýdy Arys-Túrkistan kanalynan tartýda.
Sonymen qatar, kóshelerde jaryqshamdar, qoqys jáshikteri men turǵyndardyń demalýyna arnalǵan oryndyqtar ornatyldy. Apta saiyn 32 sektor aýmaǵynda aýdan, aýyldardan kelgen azamattardyń qatysýymen senbilikter uiymdastyrylýda. Degenmen, osynsha qyrýar jumystardyń jemisti bolyp, Túrkistan qalasy tolyqtai jasyl aimaqqa ainalýy úshin árbirimizdiń úles qosýymyz asa mańyzdy. Aqsaqaldar alqasynyń bul bastamasy túrkistandyqtardyń tarapynan qoldaýǵa ie bolady dep senemin, – dedi Damir Dáýletuly.
Oblys ortalyǵyn sektorlarǵa bólip, oǵan aýdan, qalalar men salalyq basqarmalardy jaýapty etip qoiý – bul baǵyttaǵy jumystardyń jemisti bolaryna senimdi ulǵaitady. Alaida, Túrkistan qalasyna egilgen ár aǵashtyń ósip, ózdiginen jaiqalyp ketetin dárejege jetkenshe ony kútip, baptaý, ýaqytyly túbin qopsytyp, sýarý – jaýapty jandardan bólek árbirimizge júktelgen úlken mindet bolyp tur.
Túrkistan qalasyna Qazaqstannyń árbir óńiri, tipti Túrki elderi qamqorlyqpen qarap, ósip-órkendeýine óz úlesterin qosyp jatqan tusta – bizdiń jumyla áreket etip, qalany jasyl jelekke ainaldyrýdy basty maqsat etip alǵanymyz jón dep esepteimin. Osyǵan bailanysty barlyq jaýapty sala mamandaryn, aqsaqaldardy, jastar qaýymyn, jalpy qala turǵyndaryn egilgen ár aǵashqa qamqorlyqpen qarap, birigip áreket etýge shaqyramyn! Bul – óskeleń urpaq aldyndaǵy mindetimiz ári árbirimizdiń kúndelikti ómir saltymyzdy jaqsartýdyń taptyrmas joly dep bilemin, – degen Aqsaqaldar alqasynyń tóraǵasy Jarylqasyn Áziretbergenov Túrkistan qalasyn abattandyrý boiynsha atqarylǵan jumystaryn Aqsaqaldar tarapynan únemi nazarda ustaityndyǵyn jetkizdi.
