Túrkistan oblysyndaǵy “Raýan” kompaniiasynyń ujymy Prezident Qasym-Jomart Toqaevqa úndeý jasap, jergilikti atqarýshy organdar tarapynan qysym kórsetilip jatqanyn málimdedi, dep habarlaidy dalanews.kz.
Kompaniia qyzmetkerleriniń aitýynsha, “Raýan” 25 jyldan beri Qazaqstanda zańdy kásipkerlikpen ainalysyp keledi. Osy ýaqyt ishinde kásiporyn el biýdjetine shamamen 2,15 mlrd teńge salyq tólegen. Sonymen qatar ónimderin Qazaqstannan bólek Qytai, Mońǵoliia, Ózbekstan, Qyrǵyzstan, Tájikstan jáne Túrikmenstanǵa eksporttap otyrǵan.
Ujym ókilderiniń sózinshe, keiingi ýaqytta kompaniiaǵa qatysty tekserister men shaǵymdar kóbeigen. Olar memlekettik organdardyń áreketin qysym retinde baǵalap otyr.
“25 jyl boiy mundai jaǵdai bolǵan emes. Qazir kompaniianyń barlyq ruqsat qujattary men qyzmeti kúmán astynda qalyp otyr”, – dedi ujym ókilderi.
Málimdemede Túrkistan oblysynyń ákimi Nuralhan Kósherovtiń aty da atalyp, jergilikti bilik tarapynan ákimshilik kedergiler jasalyp jatqanyn alǵa tartty. Kompaniia ókilderiniń aitýynsha, birqatar ruqsat qujattarynyń kúshi toqtatylyp, jer, ekologiia jáne sanitarlyq-epidemiologiialyq baqylaý salalary boiynsha tekserister júrgizilgen.
Sondai-aq ujym kompaniia jumysynyń toqtaýy myńdaǵan adamǵa áser etýi múmkin ekenin aitty. Qazirgi tańda kásiporyn Qazaqstan boiynsha 32 distribiýtormen jumys isteidi. Bul shamamen 40 myń dúkendi qamtidy.
Kompaniia qyzmetkerleriniń biri Marina Bogomazova “Raýanda” 25 jyldan beri eńbek etip kele jatqanyn aityp, jumys oryndaryn saqtap qalýǵa kómektesýdi surady.
“Bul jer biz úshin ekinshi otbasy sekildi. Ár qyzmetkerdiń artynda otbasy, bala-shaǵa, nesie bar. Biz jumysymyzdy joǵaltqymyz kelmeidi. Elimizdiń igiligi úshin eńbek etýdi jalǵastyrǵymyz keledi”, – dedi ol.
Ujym Prezidentten jaǵdaiǵa nazar aýdaryp, kompaniia qyzmetine bailanysty máselelerdi qarastyrýdy surady.
