Túrkistanda «TURKISTAN INVESTMENT AND TOURISM FORUM – 2024» halyqaralyq ınvestısıalyq forýmy bastaldy. İs-sharaǵa otandyq jáne sheteldik ınvestorlar men jergilikti atqarýshy bılik organdarynyń ókilderi qatysyp jatyr, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Eń aldymen halyqaralyq forýmǵa kelýshiler nazaryna kórme usynyldy. Onda ınvestorlarǵa Túrkistan óńiriniń qolóneri, týrısik destınasıalary tanystyrylyp, taza tabıǵı aýyl sharýashylyǵy ónimderi kórsetildi. Sondaı-aq oblysta júzege asyrylyp jatqan jańa jobalar da tanystyryldy.
Forým aıasynda «Túrkistan – Uly Jibek jolyndaǵy halyqaralyq yntymaqtastyqtyń ortalyǵy» taqyrybynda memlekettik organdar, bıznes jáne halyqaralyq uıym ókilderiniń qatysýymen plenarlyq otyrys ótti. Onda Ortalyq Azıa tarıhı-dıplomatıalyq qoǵamdastyǵynyń tóraǵasy Serik Narysov moderator boldy.
Túrkistan oblysynyń ákimi Darhan Satybaldy forýmǵa arnaıy kelgen sheteldik ınvestorlarǵa alǵysyn aıtty.
– Túrkistan qalasynda uıymdastyrylyp otyrǵan halyqaralyq ınvestısıalyq forýmǵa qosh keldińizder! Búgingi forým jańa bastamalardy jáne ınvestısıalyq jobalardy iske asyrýǵa arnalǵan mańyzdy alań. Halyqaralyq ınvestısıalyq forýmǵa Qytaı Halyq Respýblıkasynan 120 kompanıa jáne Qazaqstan óńirlerinen 100-den astam iri kompanıa ókilderi qatysýda. Qazaqstan Respýblıkasynyń Prezıdenti Qasym-Jomart Kemeluly Toqaev pen Qytaı Halyq Respýblıkasynyń Tóraǵasy Sı Szınpın osy kúnge deıin birneshe ret kezdesip, eki jaqty qatynastardy damytýǵa baǵyttalǵan asa mańyzdy qujattarǵa qol qoıǵan. Eki el arasyndaǵy ekonomıkalyq baılanys nyǵaıa túsýde.
Sońǵy 20 jylda Qytaıdan tartylǵan ınvestısıalardyń jalpy kólemi 44 mlrd. AQSH dollaryn qurady. Túrkistan oblysy qurylǵannan bastap, Qytaı kapıtalynyń qatysýymen jalpy quny 110 mln. AQSH dollaryn quraıtyn 4 ınvestısıalyq joba iske qosyldy. Túrkistan oblysynyń álýeti óte joǵary. Aýyl sharýashylyǵy, óndiris, týrızm jáne barlyq salalarda ınvestısıalyq jobalardy júzege asyrýǵa múmkindik mol. Óńirde ınvestorlarǵa daıyn ınfraqurylymy bar jer ýchaskelerin usynatyn ındýstrıaldy aımaqtar jáne daıyn ǵımarattar ornatylǵan shaǵyn ónerkásiptik parkter bar. Joǵaryda atalǵan ınvestısıalyq alańdarda birlesken jobalardy júzege asyrýǵa shaqyramyn, – degen Darhan Satybaldy óńirdiń ınvestısıalyq áleýeti týraly keńinen baıandady.
Plenarlyq otyrys barysynda Qytaı Halyq Respýblıkasynyń Almaty qalasyndaǵy Bas konsýlynyń orynbasary Lúı I sóz alyp, halyqaralyq is-sharanyń elder arasyndaǵy dostyqty nyǵaıtýdaǵy mańyzy týraly aıtty. Sonymen birge spıkerler qatarynda QR Aýyl shaýrashylyǵy mınıstrligi men kásipkerlik salasynyń ókilderi de boldy.
Forým jumysy ári qaraı taqyryptyq paneldik otyrystarǵa jalǵasady. Halyqaralyq mańyzy bar qujattarǵa qol qoıylyp, yntymaqtastyq artady.
Aıta keteıik, Túrkistan oblysynda negizgi kaptıtalǵa tartylǵan ınvestısıa kólemi byltyrǵy jyldyń qorytyndysy boıynsha 972 mlrd teńgeni qurap, trıllıonǵa jýyqtaǵan. Bul kórsetkishter aımaqta óndiristiń damyp, ónerkásiptiń damyp jatqanyn aıǵaqtaıdy. Ári óńirde byltyr óńdeý ónerkásibinde 20 ınvestısıalyq joba tolyq iske qosylyp, jańa jumys oryndary ashyldy.
Halyqaralyq forýmnyń negizgi maqsaty – Túrkistan oblysynyń ınvestısıalyq áleýetin tanystyrý jáne óńirdiń shet eldermen ekonomıkalyq baılanystaryn nyǵaıtý. Investısıa tartyp, óndiris oryndaryn kóbeıtý.
