تۇركىستاندا «TURKISTAN INVESTMENT AND TOURISM FORUM – 2024» حالىقارالىق ينۆەستيسيالىق فورۋمى باستالدى. ءىس-شاراعا وتاندىق جانە شەتەلدىك ينۆەستورلار مەن جەرگىلىكتى اتقارۋشى بيلىك ورگاندارىنىڭ وكىلدەرى قاتىسىپ جاتىر، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ەڭ الدىمەن حالىقارالىق فورۋمعا كەلۋشىلەر نازارىنا كورمە ۇسىنىلدى. وندا ينۆەستورلارعا تۇركىستان ءوڭىرىنىڭ قولونەرى، تۋريستىك دەستيناسيالارى تانىستىرىلىپ، تازا تابيعي اۋىل شارۋاشىلىعى ونىمدەرى كورسەتىلدى. سونداي-اق وبلىستا جۇزەگە اسىرىلىپ جاتقان جاڭا جوبالار دا تانىستىرىلدى.
فورۋم اياسىندا «تۇركىستان – ۇلى جىبەك جولىنداعى حالىقارالىق ىنتىماقتاستىقتىڭ ورتالىعى» تاقىرىبىندا مەملەكەتتىك ورگاندار، بيزنەس جانە حالىقارالىق ۇيىم وكىلدەرىنىڭ قاتىسۋىمەن پلەنارلىق وتىرىس ءوتتى. وندا ورتالىق ازيا تاريحي-ديپلوماتيالىق قوعامداستىعىنىڭ ءتوراعاسى سەرىك نارىسوۆ مودەراتور بولدى.
تۇركىستان وبلىسىنىڭ اكىمى دارحان ساتىبالدى فورۋمعا ارنايى كەلگەن شەتەلدىك ينۆەستورلارعا العىسىن ايتتى.
– تۇركىستان قالاسىندا ۇيىمداستىرىلىپ وتىرعان حالىقارالىق ينۆەستيسيالىق فورۋمعا قوش كەلدىڭىزدەر! بۇگىنگى فورۋم جاڭا باستامالاردى جانە ينۆەستيسيالىق جوبالاردى ىسكە اسىرۋعا ارنالعان ماڭىزدى الاڭ. حالىقارالىق ينۆەستيسيالىق فورۋمعا جۇڭگو حالىق رەسپۋبليكاسىنان 120 كومپانيا جانە قازاقستان وڭىرلەرىنەن 100-دەن استام ءىرى كومپانيا وكىلدەرى قاتىسۋدا. قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ پەن جۇڭگو حالىق رەسپۋبليكاسىنىڭ ءتوراعاسى سي سزينپين وسى كۇنگە دەيىن بىرنەشە رەت كەزدەسىپ، ەكى جاقتى قاتىناستاردى دامىتۋعا باعىتتالعان اسا ماڭىزدى قۇجاتتارعا قول قويعان. ەكى ەل اراسىنداعى ەكونوميكالىق بايلانىس نىعايا تۇسۋدە.
سوڭعى 20 جىلدا قىتايدان تارتىلعان ينۆەستيسيالاردىڭ جالپى كولەمى 44 ملرد. اقش دوللارىن قۇرادى. تۇركىستان وبلىسى قۇرىلعاننان باستاپ، جۇڭگو كاپيتالىنىڭ قاتىسۋىمەن جالپى قۇنى 110 ملن. اقش دوللارىن قۇرايتىن 4 ينۆەستيسيالىق جوبا ىسكە قوسىلدى. تۇركىستان وبلىسىنىڭ الۋەتى وتە جوعارى. اۋىل شارۋاشىلىعى، ءوندىرىس، تۋريزم جانە بارلىق سالالاردا ينۆەستيسيالىق جوبالاردى جۇزەگە اسىرۋعا مۇمكىندىك مول. وڭىردە ينۆەستورلارعا دايىن ينفراقۇرىلىمى بار جەر ۋچاسكەلەرىن ۇسىناتىن يندۋستريالدى ايماقتار جانە دايىن عيماراتتار ورناتىلعان شاعىن ونەركاسىپتىك پاركتەر بار. جوعارىدا اتالعان ينۆەستيسيالىق الاڭداردا بىرلەسكەن جوبالاردى جۇزەگە اسىرۋعا شاقىرامىن، – دەگەن دارحان ساتىبالدى ءوڭىردىڭ ينۆەستيسيالىق الەۋەتى تۋرالى كەڭىنەن باياندادى.
پلەنارلىق وتىرىس بارىسىندا جۇڭگو حالىق رەسپۋبليكاسىنىڭ الماتى قالاسىنداعى باس كونسۋلىنىڭ ورىنباسارى ليۋي ي ءسوز الىپ، حالىقارالىق ءىس-شارانىڭ ەلدەر اراسىنداعى دوستىقتى نىعايتۋداعى ماڭىزى تۋرالى ايتتى. سونىمەن بىرگە سپيكەرلەر قاتارىندا ق ر اۋىل شاۋراشىلىعى مينيسترلىگى مەن كاسىپكەرلىك سالاسىنىڭ وكىلدەرى دە بولدى.
فورۋم جۇمىسى ءارى قاراي تاقىرىپتىق پانەلدىك وتىرىستارعا جالعاسادى. حالىقارالىق ماڭىزى بار قۇجاتتارعا قول قويىلىپ، ىنتىماقتاستىق ارتادى.
ايتا كەتەيىك، تۇركىستان وبلىسىندا نەگىزگى كاپتيتالعا تارتىلعان ينۆەستيسيا كولەمى بىلتىرعى جىلدىڭ قورىتىندىسى بويىنشا 972 ملرد تەڭگەنى قۇراپ، تريلليونعا جۋىقتاعان. بۇل كورسەتكىشتەر ايماقتا ءوندىرىستىڭ دامىپ، ونەركاسىپتىڭ دامىپ جاتقانىن ايعاقتايدى. ءارى وڭىردە بىلتىر وڭدەۋ ونەركاسىبىندە 20 ينۆەستيسيالىق جوبا تولىق ىسكە قوسىلىپ، جاڭا جۇمىس ورىندارى اشىلدى.
حالىقارالىق فورۋمنىڭ نەگىزگى ماقساتى – تۇركىستان وبلىسىنىڭ ينۆەستيسيالىق الەۋەتىن تانىستىرۋ جانە ءوڭىردىڭ شەت ەلدەرمەن ەكونوميكالىق بايلانىستارىن نىعايتۋ. ينۆەستيسيا تارتىپ، ءوندىرىس ورىندارىن كوبەيتۋ.
