QR Memlekettik qyzmet isteri agenttiginiń Túrkistan oblysy boıynsha departamentiniń uıymdastyrýymen «Men jastarǵa senemin!» atty oblystyq jastar forýmy ótti. Basty maqsat – jastardy eńbeksúıgishtikke baýlý jáne kásibı baǵyt-baǵdar bere otyryp, olardyń boıyna otansúıgishtik qasıetterdi sińirý, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Forýmǵa spıker retinde Túrkistan oblysy ákiminiń orynbasary E. Altaev, Q.A. Iasaýı atyndaǵy Halyqaralyq qazaq-túrik ýnıversıtetiniń rektory J. Temirbekova, Halyqaralyq týrızm jáne meımandostyq ýnıversıtetiniń rektory Á. Shoqparov, «Bilim-ınnovasıa lıseı-ınternatynyń» dırektory A.Mırmanov qatysty.
Sharanyń basynda sóz sóılegen oblys ákiminiń orynbasary Ertaı Altaev 2025 jyl Prezıdenttiń bastamasymen Jumysshy mamandyqtary jyly bolyp jarıalanǵanyn atap ótti.
– Búgin sizdermen kezdesip, oı bólisý múmkindigi buıyrǵanyna qýanyshtymyn. Sizder – elimizdiń bolashaǵy, memlekettik qyzmettiń jańa tolqyny, halqymyzdyń senimin aqtaıtyn jańa býynsyzdar. Qazirgi zaman talabyna saı qyzmet etý, jaýapkershilik pen adaldyq tanytý – sizderdiń basty mindetterińiz. Jas memlekettik qyzmetkerler retinde sizder jańa ıdeıalardy usynýshy, reformalardy júzege asyrýshy, jáne qoǵamǵa ózgeris ákelýshi bolasyzdar.
Zamanaýı tehnologıalar men jańa tásilderdi meńgerip, olardy óz qyzmetterińizde qoldaný arqyly elimizdi alǵa jeteleı alasyzdar. Men sizderdi shynaıy patrıot bolýǵa, elimizdi damytý jolynda aıanbaı eńbek etýge shaqyramyn. Ózderińizdiń tyń ıdeıalaryńyz ben jigerlerińiz arqyly Qazaqstannyń jarqyn bolashaǵyn qurý sizderdiń qoldaryńyzda, – dedi Ertaı Kenjebekuly.
Jıynǵa óńirimizdiń jas memlekettik qyzmetshileri, joǵarǵy oqý ornyn úzdik bitirip (GPA-3.33) memlekettik qyzmetke konkýrssyz qabyldanǵan jastar, oblystyń óńirlik kadr rezervine qabyldanǵan rezervshiler, joǵary oqý oryndarynyń stýdentteri jáne mektepterdiń joǵarǵy synyp oqýshylary jınaldy.
Forým barysynda spıkerler jastarǵa eńbek jolyndaǵy tájirıbelerin bólisip, qazirgi tańda memlekettik qyzmetke kirý kezinde artyq kedergiler men tosqaýyldardy joıý, memlekettik qyzmettiń ashyqtyǵy men qoljetimdiligin qamtamasyz etý maqsatynda Zańnamalarǵa engizilgen birqatar ózgerister men tolyqtyrýlar týraly aqparat berildi.
Aıta keteıik, Prezıdenttiń Jarlyǵyna sáıkes, QR-nyń memlekettik qyzmetin damytýdyń 2024-2029 jyldarǵa arnalǵan tujyrymdamasy bekitilip, onda mektep jáne joǵary oqý oryndaryn qamtıtyn erte kásiptik baǵdarlaý ınstıtýyn qurý kózdelgen. Iaǵnı, tujyrymdamaǵa sáıkes, memlekettik qyzmetke qyzyǵýshylyq tanytqan bitirýshi synyp oqýshylaryn mektep qabyrǵasynda júrgen kezden-aq memlekettik qyzmetke daıyndaý jumystary júrgiziletini aıtyldy.
Basqosý suraq-jaýappen jalǵasyp, oı-pikirler tyńdaldy. Jıyn sońynda departament bastamasymen ashylǵan «Jas memlekettik qyzmetshiler mektebiniń tyńdaýshylaryna arnaıy belgisheler tabystaldy.
