ق ر مەملەكەتتىك قىزمەت ىستەرى اگەنتتىگىنىڭ تۇركىستان وبلىسى بويىنشا دەپارتامەنتىنىڭ ۇيىمداستىرۋىمەن «مەن جاستارعا سەنەمىن!» اتتى وبلىستىق جاستار فورۋمى ءوتتى. باستى ماقسات – جاستاردى ەڭبەكسۇيگىشتىككە باۋلۋ جانە كاسىبي باعىت-باعدار بەرە وتىرىپ، ولاردىڭ بويىنا وتانسۇيگىشتىك قاسيەتتەردى ءسىڭىرۋ، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
فورۋمعا سپيكەر رەتىندە تۇركىستان وبلىسى اكىمىنىڭ ورىنباسارى ە. التايەۆ، ق.ا. ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ رەكتورى ج. تەمىربەكوۆا، حالىقارالىق تۋريزم جانە مەيماندوستىق ۋنيۆەرسيتەتىنىڭ رەكتورى ءا. شوقپاروۆ، «ءبىلىم-يننوۆاسيا ليسەي-ينتەرناتىنىڭ» ديرەكتورى ا.ميرمانوۆ قاتىستى.
شارانىڭ باسىندا ءسوز سويلەگەن وبلىس اكىمىنىڭ ورىنباسارى ەرتاي التايەۆ 2025 جىل پرەزيدەنتتىڭ باستاماسىمەن جۇمىسشى ماماندىقتارى جىلى بولىپ جاريالانعانىن اتاپ ءوتتى.
– بۇگىن سىزدەرمەن كەزدەسىپ، وي ءبولىسۋ مۇمكىندىگى بۇيىرعانىنا قۋانىشتىمىن. سىزدەر – ەلىمىزدىڭ بولاشاعى، مەملەكەتتىك قىزمەتتىڭ جاڭا تولقىنى، حالقىمىزدىڭ سەنىمىن اقتايتىن جاڭا بۋىنسىزدار. قازىرگى زامان تالابىنا ساي قىزمەت ەتۋ، جاۋاپكەرشىلىك پەن ادالدىق تانىتۋ – سىزدەردىڭ باستى مىندەتتەرىڭىز. جاس مەملەكەتتىك قىزمەتكەرلەر رەتىندە سىزدەر جاڭا يدەيالاردى ۇسىنۋشى، رەفورمالاردى جۇزەگە اسىرۋشى، جانە قوعامعا وزگەرىس اكەلۋشى بولاسىزدار.
زاماناۋي تەحنولوگيالار مەن جاڭا تاسىلدەردى مەڭگەرىپ، ولاردى ءوز قىزمەتتەرىڭىزدە قولدانۋ ارقىلى ەلىمىزدى العا جەتەلەي الاسىزدار. مەن سىزدەردى شىنايى پاتريوت بولۋعا، ەلىمىزدى دامىتۋ جولىندا ايانباي ەڭبەك ەتۋگە شاقىرامىن. وزدەرىڭىزدىڭ تىڭ يدەيالارىڭىز بەن جىگەرلەرىڭىز ارقىلى قازاقستاننىڭ جارقىن بولاشاعىن قۇرۋ سىزدەردىڭ قولدارىڭىزدا، – دەدى ەرتاي كەنجەبەك ۇلى.
جيىنعا ءوڭىرىمىزدىڭ جاس مەملەكەتتىك قىزمەتشىلەرى، جوعارعى وقۋ ورنىن ۇزدىك ءبىتىرىپ (GPA-3.33) مەملەكەتتىك قىزمەتكە كونكۋرسسىز قابىلدانعان جاستار، وبلىستىڭ وڭىرلىك كادر رەزەرۆىنە قابىلدانعان رەزەرۆشىلەر، جوعارى وقۋ ورىندارىنىڭ ستۋدەنتتەرى جانە مەكتەپتەردىڭ جوعارعى سىنىپ وقۋشىلارى جينالدى.
فورۋم بارىسىندا سپيكەرلەر جاستارعا ەڭبەك جولىنداعى تاجىريبەلەرىن ءبولىسىپ، قازىرگى تاڭدا مەملەكەتتىك قىزمەتكە كىرۋ كەزىندە ارتىق كەدەرگىلەر مەن توسقاۋىلداردى جويۋ، مەملەكەتتىك قىزمەتتىڭ اشىقتىعى مەن قولجەتىمدىلىگىن قامتاماسىز ەتۋ ماقساتىندا زاڭنامالارعا ەنگىزىلگەن ءبىرقاتار وزگەرىستەر مەن تولىقتىرۋلار تۋرالى اقپارات بەرىلدى.
ايتا كەتەيىك، پرەزيدەنتتىڭ جارلىعىنا سايكەس، قر-نىڭ مەملەكەتتىك قىزمەتىن دامىتۋدىڭ 2024-2029 جىلدارعا ارنالعان تۇجىرىمداماسى بەكىتىلىپ، وندا مەكتەپ جانە جوعارى وقۋ ورىندارىن قامتيتىن ەرتە كاسىپتىك باعدارلاۋ ينستيتۋىن قۇرۋ كوزدەلگەن. ياعني، تۇجىرىمداماعا سايكەس، مەملەكەتتىك قىزمەتكە قىزىعۋشىلىق تانىتقان ءبىتىرۋشى سىنىپ وقۋشىلارىن مەكتەپ قابىرعاسىندا جۇرگەن كەزدەن-اق مەملەكەتتىك قىزمەتكە دايىنداۋ جۇمىستارى جۇرگىزىلەتىنى ايتىلدى.
باسقوسۋ سۇراق-جاۋاپپەن جالعاسىپ، وي-پىكىرلەر تىڭدالدى. جيىن سوڭىندا دەپارتامەنت باستاماسىمەن اشىلعان «جاس مەملەكەتتىك قىزمەتشىلەر مەكتەبىنىڭ تىڭداۋشىلارىنا ارنايى بەلگىشەلەر تابىستالدى.
