Túrkistanda halyqaralyq HHVI «Qazaq romansiadasy» jas oryndaýshylarynyń baiqaýy óz máresine jetti. Saltanatty sharada oblys ákiminiń orynbasary Ertai Altaev mundai halyqaralyq baiqaýlardyń mańyzy joǵary ekenine toqtalyp, jeltoqsan aiynda Máskeý qalasynda ótetin halyqaralyq romans oryndaýshylarynyń qorytyndy baiqaýyna joldama alǵan Gran-pri iegerine tabys tiledi, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Shara Qazaqstan halqy Assambleiasynyń aýyzbirshilikti saqtaý, ultaralyq dostyqty nyǵaitý maqsatyndaǵy bastamalary aiasynda uiymdastyrylyp otyr.
Túrkistan oblystyq ákimdigi men «Iýjnyi Kazahstan» qoǵamdyq-saiasi gazetiniń uiymdastyrýymen ótken óner dodasyna Qazaqstan, Ózbekstan, Qyrǵyzstan jáne Tájikstan elinen 60 úmitker qatysyp, baiqaý erejesine sáikes eki kezeń boiynsha baq synady. Qazaq jáne orys tilinde romans oryndaǵan úmitkerlerdiń ónerine Reseidiń eńbek sińirgen ártisi, «Romansiada» halyqaralyq baiqaýy ideiasynyń avtory jáne uiymdastyrýshysy Galina Preobrajenskaia, Ózbekstannyń halyq ártisi, Naýai atyndaǵy memlekettik akademiialyq úlken teatrdyń jetekshi solisi Avaz Radjabov, Qyrǵyz Respýblikasynyń eńbek sińirgen ártisi Igor Vorontsov, Abai atyndaǵy memlekettik akademiialyq opera jáne balet teatrynyń solisi, Qazaqtyń kásiptik óneri kafedrasynyń dotsenti Gúlzat Beisenqyzy, Qazaqstannyń eńbek sińirgen qairatkeri, «Astana opera» jetekshi solisi Talǵat Musabaev, sonymen qatar gala-kontsert qonaǵy «Romansiada-2018» orys romansiadasy jas oryndaýshylar baiqaýynyń birinshi syilyqtyń laýreaty, opera ánshisi Nikolai Zemlianskih tórelik etti.
«Romansiada arýy» nominatsiiasymen Janel Muratbek (Shymkent), «Romansiada úmiti» nominatsiiasymen Nursándibek Jaqsylyq (Qyzylorda), Arýjan Ishanbek (Qyzylorda), Aijan Pernehan (Shymkent), Maǵjan Ómirbekov (Almaty), «Ártistik sheberligi men jarqyndyǵy» nominatsiiasymen Ulan Asekov (Bishkek), «Romantikaǵa adaldyǵy úshin» nominatsisymen Jánibek Bolatov, (Astana), Baqyt Qydyrbaev (Núkis), Ázizbek Ýsmonov (Tashkent) marapattaldy.
