Túrkistan qalasynda Qytaidyń «Hýbei» halyqaralyq kásiporyndar yntymaqtastyǵy qaýymdastyǵynyń (Hubei International Enterprise Cooperation Association) óńirlik ókildigi ashyldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Ashylý saltanatyna oblys ákimi Nuralhan Kósherov, qaýymdastyq basshylyǵynan Hýan Lisia jáne birqatar biznes-qoǵamdastyq ókilderi qatysty. Bul joba aimaqtar arasyndaǵy bailanysty nyǵaityp, ekonomikany damytýǵa, sonymen qosa, tájiribe almasý arqyly birlesken mańyzdy jobalardy júzege asyrýǵa kómektesetin múmkindikter alańy bolary sózsiz.
Atalǵan ókildiktiń negizgi maqsaty – Túrkistan oblysy men Hýbei provintsiiasy arasyndaǵy saýda-ekonomikalyq jáne investitsiialyq áriptestikti damytý. Sondai-aq kásipkerlerge eki óńir naryǵyna shyǵýǵa, birlesken jobalardy júzege asyrýǵa jáne óndiristik kooperatsiiany keńeitýge múmkindik beredi. Óńirlik ókildiktiń negizi baǵyttaryna investitsiia tartý, saýda bailanystaryn damytý, ónerkásip salasy, aýyl sharýashylyǵy, logistika, innovatsiia salalarynda birlesken kásiporyndar qurý jumystary kiredi.
Jiynda oblys ákimi óńirdi damytý baǵytyndaǵy kelissózderge ashyq ekenin jetkizdi.
– Bul ókildik Túrkistan oblysy men Hýbei provintsiiasy arasyndaǵy iskerlik bailanystardy kúsheitip, jańa ekonomikalyq múmkindikter ashady. Biz ózara tiimdi seriktestikke daiynbyz, – dedi Nuralhan Kósherov.
Aita keteiik, «Hýbei» halyqaralyq kásiporyndar yntymaqtastyǵy qaýymdastyǵy – qytailyq jáne sheteldik biznes arasyndaǵy seriktestikti damytýǵa baǵyttalǵan uiym. Qaýymdastyq investitsiialyq jobalardy qoldap, halyqaralyq naryqta kásipkerlerge kómek beredi.
