Forýmda Túrkistan oblysynyń ákimi Janseıit Túımebaev óńirdiń damýy jáne ınvestısıalyq tartymdylyǵy jóninde baıandama jasaıdy. Byltyr óńirge 482 mlrd. teńge kóleminde ınvestısıa tartylyp, bul kórsetkish boıynsha respýblıkada úzdikter qatarynan tabylǵan. Onyń ishinde óńdeý ónerkásibine 129 mlrd. teńge tartylyp, 2,5 esege ulǵaıǵan. Oblysta shaǵyn jáne orta kásipkerlik jaqsy damyǵan. Investısıa tartý maqsatynda Túrkistan qalasynda «TURKISTAN» arnaıy ekonomıkalyq aımaǵyn qurý jumystary josparlanǵan. Bul aımaqta kásipkerlerge 25 jylǵa deıin salyq tóleýde jeńildikter qarastyrylmaq.
Sonymen qatar, forýmda QR Investısıalar jáne damý mınıstri Jeńis Qasymbek, QR Mádenıet jáne sport mınıstri Arystanbek Muhamedıuly, Túrki keńesiniń bas hatshysy Baǵdat Ámireev, Eýrazıalyq ekonomıkalyq yntymaqtastyq uıymynyń bas hatshysy Vladımır Pıskýrev, «RIXOS HOTELS» prezıdenti Fetah Tamındjı, Týrızmniń Eýrazıalyq Asosıasıasynyń prezıdenti Rysty Qarabaeva, Golden Camel kompanıasynyń quryltaıshysy Eıang Djı, «DALHolding» kompanıasynyń basshysy Demırdjan Kose, «Atameken» Ultttyq kásipkerler palatasynyń basqarma tóraǵasy Abylaı Myrzahmetov jáne ózge de spıkerler sóz sóıleıdi dep josparlanǵan.
Forým aıasynda V2V formatyndaǵy kezdesýler ótip jatyr. Mańyzdy basqosýda Túrkistan oblysy ákimdigi men shetel kompanıalary arasynda kelisimder men memorandýmdarǵa qol qoıylady. Oblystyń týrısik, ekonomıkalyq áleýetin kóterý, kásipkerlikti, óndiristi damytý baǵytynda naqty jobalar usynylyp, sheteldik ınvestorlarmen kelisim jasaý kózdelgen.
Sonymen birge «Týrızm ındýstrıasy – Qazaqstan ekonomıkasynyń jańa draıveri», «Soltústik-Ońtústik ekonomıkalyq dálizi» taqyryptarynda jáne agroónerkásip keshenin damytýdaǵy adam kapıtalynyń róli jóninde pikiralmasýlar ótedi.
Túrkistan oblysy ákiminiń baspasóz qyzmeti
