Túrkistan mýzykalyq drama teatrynda V maýsym ashyldy. Maýsym shymyldyǵy biyl dańqty boksshynyń týǵanyna 45 jyl tolýyna orai «Bekzat» dramalyq qoiylymymen túrildi. Qýat Ejembektiń pesasy negizinde qoiylǵan bul týyndyda kieli Túrkistan topyraǵynda dúniege kelip, qazaq sportynyń aibyndy juldyzyna ainalǵan, Olimpiada chempiony Bekzat Sattarhanovtyń ómir joly beinelengen, dep habarlaidy Dalanews.kz.
Anshlagpen ótken premera tórt kúnge josparlanǵan. Qoiylymdy tamashalaýǵa Túrkistan oblysynyń ákimi Nuralhan Kósherov, Bekzattyń anasy Syrlykúl Sattarhanova jáne Tursynǵali Edilov, Myrzaǵali Aitjanov, Nurlan Jumabaev bastaǵan tanymal bapkerler arnaiy kelip tamashalady. Sonymen birge Olimpiada chempiony Ermahan Ibraimov pen kúmis júldeger Muhtarhan Dildábekov jáne ózge de álem chempiondary men júldegerleri kórermen qataryn tolyqtyrdy.
Teatrǵa kelgen kórermender qoiylym bastalar aldynda Olimpiada chempiony Bekzat Sattarhanovtyń ómiri men sporttyq jetistikterine arnalǵan arnaiy kórmemen tanysty. Ekspozitsiiada boksshynyń jeke zattary, fotosýretteri men marapattary qoiylǵan. Oblys ákimi Bekzattyń anasy – Syrlykúl apanyń iyǵyna oramal jaýyp, qurmet kórsetti.
Spektakl – tek sharshy alańdaǵy jeńisterdi ǵana emes, ananyń alańdaǵan júregin, ákeniń úkili úmitin, alǵashqy mahabbattyń móldir sezimin, jarystardaǵy básekelestikti shynaiy jetkizip, jurtshylyqty tánti etti. Osylaisha, kórermen Bekzattyń sporttyq biikterin ǵana emes, onyń adami bolmysyn, názik sezimderin, otbasylyq qundylyqtaryn jáne el aldyndaǵy jaýapkershiligin de tanyp bildi.
Bekzattyń bokstaǵy alǵashqy qadamy bapkeri Nurlan Jumabaevtyń qolynda bastalǵan. Keiin ol ulttyq quramanyń tanymal jattyqtyrýshylary Aleksandr Apachinskii pen Tursynǵali Edilovtiń qoldaýymen halyqaralyq arenaǵa shyqty. Olimpiada qarsańynda sportshy elimizdiń áigili sport sańlaqtary Ermahan Ibraimov, Bolat Jumadilov, Muhtarhan Dildabekovmen birge daiyndalyp, sheberligin shyńdady.
Basty rólderderde – Qadyrjan Tórehanov, Dosymjan Arqabekov, Aq-Sultan Ánýarbek, Sherhan Samatuly, Temirlan Erkinǵaliev, Muzafar Ǵalymjanuly, Daniias Nurqabden, Merei Qudaibergenov, Dinar Qaldybai, Temir-Sultan Meiirbek, Inabat Abythan, Aida Serikova, Aqbópe Sábet, Aidana Aqqali, Ulan Ádilbek, Sembai Nurla jáne taǵy basqa da ártister bar.
Premerany tamashalaǵan kórermen qaýym qazaq sportynyń shoqjuldyzy Bekzat Sattarhanovty eske alyp, erekshe tebirenispen qoldaý bildirip, óner ujymynyń izdenisin joǵary baǵalady.
Qoiylym ideiasynyń avtory – Asylhan Tólepov, joba jetekshisi – Aigerim Bozshina. Al pesanyń avtory – Qýat Ejembek, qoiýshy rejisseri – Karlo Shakalýga. Aita ketsek, atalǵan qoiylymnyń premerasy 9-12 qazan kúnderi aralyǵynda saǵat 19:00-de ótedi.
Premera sońynda oblys ákimi Nuralhan Kósherov teatr ujymyna yqylas gúlin syilady.
