Óńirdegi 55 myńnan astam muǵalimdi tól merekemen quttyqtap, saltanatty sharany ashyp bergen oblys ákimi Janseıit Túımebaev ustazdar qaýymynyń bolashaq urpaǵymyzdy oqytyp, tárbıeleýdegi róliniń mańyzy zor ekenin aıtty.
"Búgingi tól merekelerińiz erekshe ýaqytta, Elbasynyń Qazaqstan halqyna arnaǵan jańa Joldaýymen qatar, jańadan Túrkistan oblysy bolyp qurylǵan kezeńde ótýde. Nursultan Ábishuly Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty keshegi Joldaýynda halyqty baspanamen qamtamasyz etý, densaýlyq saqtaý, bilim men ǵylymdy damytý, ony qarjylandyrýdy jalpyulttyq ónimniń 10 paıyzyna deıin jetkizý, polısıa men sot júıesin, memlekettik basqarýdy jetildirý, atalǵan salalardaǵy qyzmetkerlerdiń kásibı biliktiligi men áleýmettik qorǵalýyn arttyrý sekildi kóptegen mańyzdy máselelerdi qozǵap, alda atqarylýy tıis mindetter aıqyndap berdi. Sonymen qatar, Elbasy Joldaýda bilim salasyna asa nazar aýdaryp, sybaılas jemqorlyqtyń táýekeldiligi kemimeı, pedagogtardy jáne qyzmetkerlerdi jumysqa qabyldaýda keleńsiz jaǵdaılardyń oryn alyp otyrǵandyǵyn atap ótti", - dedi J.Túımebaev.
Sonymen birge, saltanatty basqosýda aımaǵymyzdaǵy 5 ardager ustaz ben 20 muǵalim oblys ákiminiń "Alǵys hatymen" marapattaldy. Al Qazyǵurt aýdany, J.Qapparov atyndaǵy №5 oblystyq mamandandyrylǵan fızıka-matematıkalyq mektep-ınternatynyń ujymyna quny 20 mln. teńge bolatyn "Orta bilim beretin úzdik uıymy" granty tabystaldy.
Merekelik júzdesýde birqatar ardager ustazdar minberge shyǵyp, pedagogtar qaýymyn kásibı merekemen quttyqtady.
Jalpy, sońǵy jyldary oblys oqýshylarynyń bilimge degen yntasy artyp keledi. Bıyldyń ózinde daryndy oqýshylarymyz halyqaralyq jáne respýblıkalyq deńgeıdegi 100 – den astam bilim saıystarynda júldeger atandy.
Óńirimiz sońǵy úsh jylda matematıka jáne jaratylystaný baǵytyndaǵy pánderden respýblıkalyq olımpıadalarda «Eń úzdik olımpıadalyq komandasy» ataǵy men İİ, İİİ júldeli oryndardy ıelenýde.
Respýblıkalyq olımpıada jáne ǵylymı jobalar qorytyndysy boıynsha bilim uıymdarynyń jyl saıyn 100-digi anyqtalyp, marapattalady. Bıyl solardyń qataryna oblysymyzdyń tórt orta bilim berý uıymy enip otyr. Atap aıtsaq, olar — Túrkistan qalasy, N.Nekrasov atyndaǵy №9 mektep-gımnazıasy men Kentaý qalasyndaǵy «Iassaýı» jáne «Iqan» jalpy orta mektepteri.
Búgingi kúni, Túrkistan oblysynda jumysqa qabyldaý jumys.sitcen.kz portaly arqyly elektrondy túrde júrgizilýde. Osy jańa formatta qabyldaý júıesi ári qaraı jalǵastyrylyp, ashyq, jarıaly túrde iske asyrylady.
Túrkistan oblysy ákiminiń baspasóz qyzmeti
