وڭىردەگى 55 مىڭنان استام ءمۇعالىمدى ءتول مەرەكەمەن قۇتتىقتاپ، سالتاناتتى شارانى اشىپ بەرگەن وبلىس اكىمى جانسەيىت تۇيمەبايەۆ ۇستازدار قاۋىمىنىڭ بولاشاق ۇرپاعىمىزدى وقىتىپ، تاربيەلەۋدەگى ءرولىنىڭ ماڭىزى زور ەكەنىن ايتتى.
"بۇگىنگى ءتول مەرەكەلەرىڭىز ەرەكشە ۋاقىتتا، ەلباسىنىڭ قازاقستان حالقىنا ارناعان جاڭا جولداۋىمەن قاتار، جاڭادان تۇركىستان وبلىسى بولىپ قۇرىلعان كەزەڭدە وتۋدە. نۇرسۇلتان ءابىش ۇلى نازاربايەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى كەشەگى جولداۋىندا حالىقتى باسپانامەن قامتاماسىز ەتۋ، دەنساۋلىق ساقتاۋ، ءبىلىم مەن عىلىمدى دامىتۋ، ونى قارجىلاندىرۋدى جالپىۇلتتىق ءونىمنىڭ 10 پايىزىنا دەيىن جەتكىزۋ، پوليسيا مەن سوت جۇيەسىن، مەملەكەتتىك باسقارۋدى جەتىلدىرۋ، اتالعان سالالارداعى قىزمەتكەرلەردىڭ كاسىبي بىلىكتىلىگى مەن الەۋمەتتىك قورعالۋىن ارتتىرۋ سەكىلدى كوپتەگەن ماڭىزدى ماسەلەلەردى قوزعاپ، الدا اتقارىلۋى ءتيىس مىندەتتەر ايقىنداپ بەردى. سونىمەن قاتار، ەلباسى جولداۋدا ءبىلىم سالاسىنا اسا نازار اۋدارىپ، سىبايلاس جەمقورلىقتىڭ تاۋەكەلدىلىگى كەمىمەي، پەداگوگتاردى جانە قىزمەتكەرلەردى جۇمىسقا قابىلداۋدا كەلەڭسىز جاعدايلاردىڭ ورىن الىپ وتىرعاندىعىن اتاپ ءوتتى"، - دەدى ج.تۇيمەبايەۆ.
سونىمەن بىرگە، سالتاناتتى باسقوسۋدا ايماعىمىزداعى 5 ارداگەر ۇستاز بەن 20 ءمۇعالىم وبلىس اكىمىنىڭ "العىس حاتىمەن" ماراپاتتالدى. ال قازىعۇرت اۋدانى، ج.قاپپاروۆ اتىنداعى №5 وبلىستىق مامانداندىرىلعان فيزيكا-ماتەماتيكالىق مەكتەپ-ينتەرناتىنىڭ ۇجىمىنا قۇنى 20 ملن. تەڭگە بولاتىن "ورتا ءبىلىم بەرەتىن ۇزدىك ۇيىمى" گرانتى تابىستالدى.
مەرەكەلىك جۇزدەسۋدە ءبىرقاتار ارداگەر ۇستازدار مىنبەرگە شىعىپ، پەداگوگتار قاۋىمىن كاسىبي مەرەكەمەن قۇتتىقتادى.
جالپى، سوڭعى جىلدارى وبلىس وقۋشىلارىنىڭ بىلىمگە دەگەن ىنتاسى ارتىپ كەلەدى. بيىلدىڭ وزىندە دارىندى وقۋشىلارىمىز حالىقارالىق جانە رەسپۋبليكالىق دەڭگەيدەگى 100 – دەن استام ءبىلىم سايىستارىندا جۇلدەگەر اتاندى.
ءوڭىرىمىز سوڭعى ءۇش جىلدا ماتەماتيكا جانە جاراتىلىستانۋ باعىتىنداعى پاندەردەن رەسپۋبليكالىق وليمپيادالاردا «ەڭ ۇزدىك وليمپيادالىق كومانداسى» اتاعى مەن ءىى، ءىىى جۇلدەلى ورىنداردى يەلەنۋدە.
رەسپۋبليكالىق وليمپيادا جانە عىلىمي جوبالار قورىتىندىسى بويىنشا ءبىلىم ۇيىمدارىنىڭ جىل سايىن 100-دىگى انىقتالىپ، ماراپاتتالادى. بيىل سولاردىڭ قاتارىنا وبلىسىمىزدىڭ ءتورت ورتا ءبىلىم بەرۋ ۇيىمى ەنىپ وتىر. اتاپ ايتساق، ولار — تۇركىستان قالاسى، ن.نەكراسوۆ اتىنداعى №9 مەكتەپ-گيمنازياسى مەن كەنتاۋ قالاسىنداعى «ياسساۋي» جانە «يقان» جالپى ورتا مەكتەپتەرى.
بۇگىنگى كۇنى، تۇركىستان وبلىسىندا جۇمىسقا قابىلداۋ jumys.sitcen.kz پورتالى ارقىلى ەلەكتروندى تۇردە جۇرگىزىلۋدە. وسى جاڭا فورماتتا قابىلداۋ جۇيەسى ءارى قاراي جالعاستىرىلىپ، اشىق، جاريالى تۇردە ىسكە اسىرىلادى.
تۇركىستان وبلىسى اكىمىنىڭ باسپا ءسوز قىزمەتى
