Túrkistan qalasyndaǵy «Etnoaýyl» kesheninde «Jalpy ulttyq qundylyq – el damýy» jobasy aiasynda «Urpaqqa amanat» oblystyq forýmy ótti. Atalǵan forým Túrkistan oblysynyń qoǵamdyq damý basqarmasynyń qoldaýymen jáne «Shańyraq» qoǵamdyq birlestiginiń uiymdastyrýymen júzege asty,- dep habarlaidy Dalanews.kz
Sharaǵa Túrkistan oblysy ákiminiń orynbasary Ertai Altaev qatysyp, ulttyq qundylyq – ulttyń rýhani ózegi ekenin aityp, ony saqtaý men jańǵyrtý – árbir azamattyń, ásirese jas urpaqtyń paryzy ekenin jetkizdi.
Is-shara aiasynda «Ulttyq qundylyq – ulttyń uly muraty» atty oblystyq ideialar baiqaýynyń jeńimpazdary marapattaldy. Jalpy baiqaýǵa 51 joba usynylyp, onyń 17-si úzdik dep tanyldy. Baiqaý qorytyndysy boiynsha 1-oryn «Kiiz óndirý – ulttyq óndiris, turaqty tabys kózi» jobasyna buiyrsa. 2-oryn «Rýhani murany zamanaýi úlgide dáripteý» jobasyna, al 3-oryn «Uly Dala jaýharlary» jobasyna berildi.
Forým barysynda qazaqstandyq etnodizainer Tilek Sultannyń arnaiy «Kóneniń kózi» atty ulttyq kiimder kollektsiiasy kórermen nazaryna usynyldy.
Sondai-aq forýmda Abai elindegi respýblikalyq «Jeti qazyna» baiqaýynyń jeńimpazy Aqmaral Asanqyzy, aitysker aqyn Birjan Baitýov, «QR mádeniet salasynyń úzdigi, qolónershi Aidarsha Mereke, salt-dástúr tanýshy ekspert Gúlshat Jahanqyzy syndy elge tanymal spikerler mańyzdy baiandamalar jasady. Olar qazaq qolóneri, ulttyq kiimder, otbasylyq tárbieniń mańyzy jáne toi mádenieti sekildi urpaqqa amanat bolatyn asyl muralardy boiamasyz jetkizýdiń mańyzdylyǵyn atap ótti.
