Túrkistan tórinde sahnalanǵan baǵdarlama Eýropa men Amerikanyń iri qalalarynda kórsetilip, kórermenniń ystyq yqylasyna bólengen bolatyn. Bul is-shara el Táýelsizdiginiń 30 jyldyq mereitoiy aiasynda, Mádeniet jáne sport ministrliginiń, Túrkistan oblysy ákimdiginiń qoldaýymen ótip otyr. Balet teatry ujymy uly dalamyzda bolǵan túrli oqiǵalardy bi tilimen baiandaýdy jón kóripti.
– Qazaq halqynyń ulttyq biiniń tamyry tereńde. Munda biz halqymyzdyń talai ǵasyrdan beri jalǵasyp jatqan kórkemdik ustanymdaryn, dúnietanymyn tani alamyz. Teatrymyzda biz osy kúnge deiin saqtalyp kelgen bai muramyzǵa súiene otyryp, ulttyq plastika tilin baiyta túsýdiń tyń joldaryn da izdestirýge kúsh salyp kelemiz. Meniń bir baiqaǵanym, qai bidi oryndasaq ta, adamnyń táni áldebir ulttyq kodty saqtap turatyn qasietke ie. Muny sózben aityp jetkizý, túsindirý múmkin emes. Bul tabiǵi túrde kórinis tabatyn dúnie. Sonyń arqasynda kez-kelgen qarapaiym qimyldyń ózindik, biregei sipaty kórinip turady, – deidi avtorlardyń biri Aigúl Táti.
Qazaq halqynyń bolmys-bitimin pash etken qoiylymda myń buralǵan bishiler joǵary deńgeide óner kórsetti. Ulttyq aspaptardyń súiemeldeýimen ótken kesh jurtshylyqqa asqaq rýh, estetikalyq lázzat syilady.
Elordadan kelgen balet teatrynyń kórkemdik jetekshisi Nurlan Kanetov
– Túrki áleminiń rýhani astanasyna gastroldik saparymyz Táýelsizdigimizdiń 30 jyldyq mereitoiy aiasynda ótip otyrǵanyna kóńil aýdarǵym keledi. Kórermen qaýym – uly dalanyń asyl murasyn saqtap, keler urpaqqa jetkizý jolyndaǵy qadamymyzǵa oń baǵasyn berer degen senimdemiz, – dei kele túrkistandyqtarǵa, Túrkistandaǵy ózgeristerge rizashylyǵyn bildirdi.
