Túrkistanda «Úles» qaiyrymdylyq qorynyń qoldaýymen eki muqtaj otbasy baspanaly boldy
Respýblika kúni merekesi qarsańynda búgin eki túrkistandyq muqtaj otbasy baspanaly boldy. Úidi «Úles» qaiyrymdylyq qory salyp berdi. Bul qaiyrymdylyq qory osymen óńirdegi 45-otbasyǵa úi syilap otyr, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Izgi sharaǵa Túrkistan oblystyq qoǵamdyq damý basqarmasy «Qoǵamdyq kelisim» KMM-i basshysynyń orynbasary Ernazar Baetov, etnomádeni birlestikteriń músheleri, aqsaqaldar, BAQ ókilderi qatysty.
Túrkistan qalalyq ózbek etnomádeni birlestiginiń tóraǵasy, ulaǵatty ustaz Raiymjan Qoshqarov jurtshylyqqa «Úles» qoǵamdyq qory arqyly jasaǵan qaiyrymdy isterimen de jaqsy tanys. Ol basqaryp otyrǵan qor 14 jyldan beri úi salyp, baspanaǵa muqtaj otbasyǵa tegin berip keledi.
Elimizdiń ulyq merekesinde qýanyshqa kenelgen otbasynyń biri – túrkistandyq F.Ahmetjanova. Onyń 3 uly, 1 qyzy bar. Joldasy kólik apatyna ushyrap, qaza tapqan. Tórt bólmeli óz baspanasynyń tabaldyryǵyn attaǵan jalǵyzbasty ana qýanyshtan kózine jas alyp, kómek qolyn sozǵan barsha azamattarǵa alǵysyn bildirdi. Al aqsaqaldar qutty baspana bolsyn degen tileýlestikpen aq batalaryn beristi.
Atalǵan qordyń kómegimen ekinshi baspana Saýran aýdanyna qarasty Júinek aýylyndaǵy muqtaj otbasyǵa berildi. Osy aýyldyń atymtai jomarttary men 2004 jyly bitirgen mektep túlekteri birlesip, eski úidiń ornyna jańa baspana salyp bergen. Shańyraq iesi Á. Haidarov jaqsylyqqa jany qumar jandarǵa alǵysyn jetkizip, «Elimiz aman, egemendigimiz máńgi bolsyn, árbir shańyraqtan yrys-bereke ketpesin» degen tilegin aitty.
Búginde «Úles» qaiyrymdylyq qorynyń 300-ge jýyq múshesi bar. Olardyń basym bóligi – on saýsaǵynan óner tamǵan ustalar men sheberler, qurylysshylar, baspana salýǵa mashyqtanǵan mamandar. Iaǵni qaiyrymdy jandar tikelei jumysynan tys ýaqytta salynyp jatqan qurylysqa kelip qolushyn beredi. Qurylys materialdary da keide qordyń ózinen, keide qaiyrymdylyq aktsiialardyń, demeýshilerdiń esebinen jinaqtalady. Yntymaq, birliktiń nátijesinde imandylyq uiyǵan Túrkistan oblysynda kópke úlgi bolarlyq osyndai igi ister atqarylyp keledi.
