تۇركىستاندا «ۇلەس» قايىرىمدىلىق قورىنىڭ قولداۋىمەن ەكى مۇقتاج وتباسى باسپانالى بولدى
رەسپۋبليكا كۇنى مەرەكەسى قارساڭىندا بۇگىن ەكى تۇركىستاندىق مۇقتاج وتباسى باسپانالى بولدى. ءۇيدى «ۇلەس» قايىرىمدىلىق قورى سالىپ بەردى. بۇل قايىرىمدىلىق قورى وسىمەن وڭىردەگى 45-وتباسىعا ءۇي سىيلاپ وتىر، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ىزگى شاراعا تۇركىستان وبلىستىق قوعامدىق دامۋ باسقارماسى «قوعامدىق كەلىسىم» كمم-ى باسشىسىنىڭ ورىنباسارى ەرنازار باەتوۆ، ەتنومادەني بىرلەستىكتەرىڭ مۇشەلەرى، اقساقالدار، ب ا ق وكىلدەرى قاتىستى.
تۇركىستان قالالىق وزبەك ەتنومادەني بىرلەستىگىنىڭ ءتوراعاسى، ۇلاعاتتى ۇستاز رايىمجان قوشقاروۆ جۇرتشىلىققا «ۇلەس» قوعامدىق قورى ارقىلى جاساعان قايىرىمدى ىستەرىمەن دە جاقسى تانىس. ول باسقارىپ وتىرعان قور 14 جىلدان بەرى ءۇي سالىپ، باسپاناعا مۇقتاج وتباسىعا تەگىن بەرىپ كەلەدى.
ەلىمىزدىڭ ۇلىق مەرەكەسىندە قۋانىشقا كەنەلگەن وتباسىنىڭ ءبىرى – تۇركىستاندىق ف.احمەتجانوۆا. ونىڭ 3 ۇلى، 1 قىزى بار. جولداسى كولىك اپاتىنا ۇشىراپ، قازا تاپقان. ءتورت بولمەلى ءوز باسپاناسىنىڭ تابالدىرىعىن اتتاعان جالعىزباستى انا قۋانىشتان كوزىنە جاس الىپ، كومەك قولىن سوزعان بارشا ازاماتتارعا العىسىن ءبىلدىردى. ال اقساقالدار قۇتتى باسپانا بولسىن دەگەن تىلەۋلەستىكپەن اق باتالارىن بەرىستى.
اتالعان قوردىڭ كومەگىمەن ەكىنشى باسپانا ساۋران اۋدانىنا قاراستى جۇينەك اۋىلىنداعى مۇقتاج وتباسىعا بەرىلدى. وسى اۋىلدىڭ اتىمتاي جومارتتارى مەن 2004 جىلى بىتىرگەن مەكتەپ تۇلەكتەرى بىرلەسىپ، ەسكى ءۇيدىڭ ورنىنا جاڭا باسپانا سالىپ بەرگەن. شاڭىراق يەسى ءا. حايداروۆ جاقسىلىققا جانى قۇمار جاندارعا العىسىن جەتكىزىپ، «ەلىمىز امان، ەگەمەندىگىمىز ماڭگى بولسىن، ءاربىر شاڭىراقتان ىرىس-بەرەكە كەتپەسىن» دەگەن تىلەگىن ايتتى.
«بىرلىك بولماي، تىرلىك بولماس» دەگەن ءسوز بەكەر ايتىلماعان. جانىمىزدا قايىرىمدى جىگىتتەر قاتارى كوبەيدى. بىزگە اركىم ءوز ەركىمەن كەلەدى. باعالاي بىلسەك، جاقسى ادامدار كوپ. جايدان جاي، سەبەپسىز ەشتەڭە بولمايدى. بەلگىلى ءبىر وتباسىنا ءۇي سالىپ بەرەتىن كەزدە ءبارى جان-جاقتى تەكسەرىلەدى. راسىندا دا ول وتباسى مۇقتاج با؟ نەگىزىنەن، تۇرمىسى ناشار، شيەتتەي بالا-شاعامەن جەسىر قالعان، اۋىلدا تۇراتىن مۇقتاجداردى باسپانالى ەتتىك. ءتۇرلى تاعدىر. قىرىقتان اسا ءۇيدىڭ كىلتىن تاعدىرى بىر-بىرىنە ۇقسامايتىن قانشاما جاندارعا بەردىك. «جالعىزدىڭ ءۇنى شىقپاس، جاياۋدىڭ شاڭى شىقپاس» دەگەن حالىق دانالىعى. ساۋابى مول وسى قايىرىمدىلىقتىڭ ءبارى مەنىڭ دوستارىمنىڭ، شاكىرتتەرىمنىڭ، جالپى اتسالىسىپ وتىرعان كوپشىلىكتىڭ ىنتىماعىنىڭ ناتيجەسى»، – دەيدى يگى ءىستىڭ باسى-قاسىندا جۇرگەن «ۇلەس» قايىرىمدىلىق قورىنىڭ باسشىسى رايىمجان ابدۋساتتار ۇلى.
بۇگىندە «ۇلەس» قايىرىمدىلىق قورىنىڭ 300-گە جۋىق مۇشەسى بار. ولاردىڭ باسىم بولىگى – ون ساۋساعىنان ونەر تامعان ۇستالار مەن شەبەرلەر، قۇرىلىسشىلار، باسپانا سالۋعا ماشىقتانعان ماماندار. ياعني قايىرىمدى جاندار تىكەلەي جۇمىسىنان تىس ۋاقىتتا سالىنىپ جاتقان قۇرىلىسقا كەلىپ قولۇشىن بەرەدى. قۇرىلىس ماتەريالدارى دا كەيدە قوردىڭ وزىنەن، كەيدە قايىرىمدىلىق اكسيالاردىڭ، دەمەۋشىلەردىڭ ەسەبىنەن جيناقتالادى. ىنتىماق، بىرلىكتىڭ ناتيجەسىندە يماندىلىق ۇيىعان تۇركىستان وبلىسىندا كوپكە ۇلگى بولارلىق وسىنداي يگى ىستەر اتقارىلىپ كەلەدى.
