Túrkistan qalasyndaǵy Q.A. Iasaýi atyndaǵy Halyqaralyq qazaq-túrik ýniversitetinde Túrki áleminiń birinshi halyqaralyq geografiia kongresi ótti, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Jiynǵa Qazaqstan, Túrkiia, Ózbekstan, Qyrǵyzstan, Resei túrki tildes elderden 200-ge jýyq ǵalym men zertteýshiler, óńirdegi mektep oqytýshylary, ýniversitet ujymy men stýdentteri qatysty.
Túrkistan oblysy ákiminiń birinshi orynbasary Zulpyhar Joldasov arnaiy qatysyp, óńir basshysy Darhan Satybaldynyń quttyqtaý hatyn jetkizdi.
Al ýniversitet rektory Janar Temirbekova kelgen qatysýshylarǵa alǵysyn bildirdi. Ál-Farabi atyndaǵy Qazaq Ulttyq ýniversitetiniń Basqarma tóraǵasy – rektory Janseiit Túimebaevtyń atynan atalǵan oqý ordasynyń ókilderi de quttyqtaýyn jetkizdi.
Úsh kúnge ulasqan kongress barysynda «Túrkistan oblysynyń geografiiasy» oqý quralynyń jáne «Túrki tildes elder geografiiasy» oqýlyǵynyń 4-shi basylymynyń tusaýkeseri ótti. Sondai-aq, saiasattaný ǵylymdar doktory, professor Muhit-Ardager Sydyqnazarov «Qazaq memlekettiliginiń tarihy – kóne kartalarda» atty ashyq lektsiia ótkizdi.
Jiynnyń mańyzdy oqiǵalarynyń biri – Ahmet Iasaýi ýniversitetiniń bazasynda «XI-XIX ǵǵ. Eýropalyq jáne shyǵys kartalaryndaǵy túrki memleketteri» atty Galereianyń saltanatty ashylý rásimi boldy.
Tanymal kartograf-ǵalym Muhit-Ardager Sydyqnazarovtyń uzaq jyldarǵa sozylǵan zertteý nátijesi retinde ashylǵan galereiada Qazaqstan, Túrkiia, Ázirbaijan, Túrkmenstan, Qyrǵyzstan jáne Ózbekstan elderiniń ejelgi Eýropa jáne shyǵys kartalaryndaǵy mańyzy men orny kórsetilgen.
Ol Qazaqstan ǵana emes, kúlli túrki tildes elderdiń tarihynan syr shertetin kartalar galereiasy alǵash ret ýniversitet bazasynda ashylǵanyn atap ótti. Budan bólek, kongres aiasynda ál-Farabi atyndaǵy QazUÝ-dyń Geografiia jáne tabiǵatty paidalaný fakýltetiniń ǵylymi kórmesi uiymdastyryldy. Kongreske jinalǵan ǵalymdar 6 sektsiiaǵa bólinip, negizgi taqyryp aiasynda pikir men tájiribe almasty.
Aita keteiik, kongrestiń negizgi maqsaty ‒ Eýraziia materigindegi ulan-ǵaiyr aimaqta qonystanǵan Túrki tildes elderdiń ǵalymdary arasyndaǵy yntymaqtastyqty nyǵaityp, geografiialyq zertteýlerdiń damýyna yqpal etý. Atalǵan is-sharany Ahmet Iasaýi atyndaǵy Halyqaralyq qazaq-túrik ýniversiteti, ál-Farabi atyndaǵy Qazaq ulttyq ýniversiteti, Geografiiadan Respýblikalyq ataýly mektep jáne Geografiia jáne sý qaýipsizdigi institýty uiymdastyrǵan.
