Qazaqstan Respýblikasynyń Prezidenti Qasym-Jomart Toqaevtyń tapsyrmasymen Túrki áleminiń rýhani astanasy – Túrkistan qalasynyń erekshe mártebege ie bolýyna orai «TURKISTAN STYLE» halyqaralyq sýretshiler simpoziýmy óz máresine jetti. 6 kúnge sozylǵan is-sharaǵa álemniń 8 memleketinen kelgen sýretshiler qatysty, - dep habarlaidy Dalanews.kz
Olardyń qatarynda Úndistan, Túrkiia, Ázerbaijan, Belorýssiia, Ózbekstan, Qyrǵyzstan, Reseiden jáne Qazaqstannyń ár óńirinen kelgen tanymal sýretshiler men professorlar bar. Onda 120-dan astam shyǵarmalar usynyldy. Bul – qylqalam sheberleriniń erekshe mártebege ie bolǵan Túrkistandy ulyqtaýǵa qosqan úlesteri.
Simpoziýmnyń qorytyndysy retinde «Kongress holl» kesheniniń foiesinde halyqaralyq sýretshiler simpoziýmynyń shyǵarmalarynan kórme uiymdastyryldy. Qylqalam sheberleriniń Túrkistannyń qazirgi beinesi beinelengen sýretteri jurtshylyqqa usynyldy.
Simpoziýmnyń qorytyndy kórmesiniń ashylý rásiminde Túrkistan oblysy ákiminiń orynbasary Ertai Altaev «TURKISTAN STYLE» halyqaralyq simpoziýmyna qatysýshy sýretshilerdi quttyqtap, diplomdarmen marapattap, sertifikattar tapsyrdy.
– Túrkistan qalasy zamanaýi qaita jańǵyryp, erekshe mártebege ie bolǵanyn bilesizder. Osyndai sátte sýretshilerdiń rýhani astananyń kóne tarihy men jańarýyn beinelegen týyndylary, onyń ejelgi tarihyna taǵy bir úńilip, kieli Túrkistannyń búgingi kúnin óner tilimen ulyqtaýy – quptarlyq is. Sizder salǵan óner týyndylary urpaqqa eń qymbat mura, mańyzy zor derekti miras bolyp qalatyny sózsiz, – dedi oblys ákiminiń orynbasary Ertai Kenjebekuly.
Qyrǵyzstan Respýblikasynyń halyq sýretshisi, Toqtoǵul atyndaǵy memlekettik syilyqtyń iegeri akademik Iýristanbek Shyǵaev pen QR Kórkem akademiiasynyń akademigi jáne vitse-prezidenti Erlan Aitýarov beineleý ónerin damytý maqsatyndaǵy osyndai aýqymdy is-sharalardyń mańyzdylyǵyna toqtalyp, sýretshiler atynan alǵystaryn bildirdi.
