Túrkistanda soltústikke kóshý boiynsha 4 oblyspen talqylaý ótti
Zoom júiesi arqyly ótken jiynǵa Túrkistan, SQO, ShQO, Qostanai men Pavlodar oblystyq jumyspen qamtýdy úilestirý jáne áleýmettik baǵdarlamalar basqarmalarynyń basshylary men jaýapty ókilderi, Túrkistan oblystyq máslihatynyń depýtattary, jumyspen qamtý bólimderiniń basshylary qatysty. Májilistiń moderatory – «Nur Otan» partiiasy Túrkistan oblystyq filialy tóraǵasynyń birinshi orynbasary, oblystyq máslihat depýtaty Beisenbai Tájibaev kóshi-qon salasy strategiialyq mańyzy bar másele ekenin atap ótti.
«Nur Otan» partiiasynyń «Ózgerister joly: ár azamatqa laiyqty ómir!» sailaýaldy baǵdarlamasynda oblys turǵyndarynyń ál-aýqatyn kóterý kózdelgen. Bul rette óńir turǵyndaryn jumys oryndary kóp Soltústik óńirlerge kóshýine qoldaý kórsetý arqyly eńbek resýrstaryn tiimdi úilestirýge múmkindik mol. «Jumyspen qamtýdyń jol kartasy-2020» baǵdarlamasy júzege asqan 5 jylda ShQO, SQO, Pavlodar jáne Qostanai oblystaryna 20 myńnan astam adam qonys aýdarǵan bolsa, onyń 6 myńdaiy nemese 1700-dei otbasy – Túrkistan oblysynyń turǵyndary. Biz kóshýge niet bildirgen azamattarǵa kómektesý, osy baǵytta aqparattyq jáne túsindirme jumystaryn júrgizýdi jandandyrýymyz kerek. Árbir azamat Soltústikke qalai kóshý kerektigin, olarǵa memleketten qandai qoldaý bolatynyn bilýi tiis», – dedi B.Tájibaev.
Kóshi-qon salasyna úles qosyp júrgen belsendi azamat «Evroremont servis» JShS-nyń direktory Jańabai Aǵabekov «Qonystanýshylardyń nesie qaryzyna 6 aiǵa deiin kanikýl berilse, óńirlerdiń ereksheligimen tanystyratyn beiimdeý ortalyqtary ashylsa, ár aýylǵa kem degende 5-10 otbasyny birge qonystandyrsa, kósh jandanar edi. Qazirdiń ózinde Túrkistan oblysynan kóshýge niet bildirip otyrǵan azamattar jeterlik», – dedi. Al Túrkistan oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Nurjan Nurashov «Eńbek» baǵdarlamasy boiynsha qonystanýshylardyń 30 paiyzy Túrkistan oblysynyń turǵyndary ekenin baiandady. Onyń málimetinshe, atqarylǵan jumystar nátijesinde jyl basynan beri Túrkistan oblysynan 36 otbasy, 117 adam qonys aýdarǵan. Jalpy 5 jyl ishinde Túrkistan óńirinen kóshkenderdiń 2286-sy jumysqa qabiletti bolsa, onyń 1545-i turaqty jumyspen qamtylǵan.
Eger Soltústikke qonys aýdarsańyz «Eńbek» baǵdarlamasy sheńberinde otbasynyń árbir múshesine 35 AEK (102095 teńge) mólsherinde materialdyq qoldaý kórsetiledi. Sondai-aq on eki ai ishinde turǵyn úidi jaldaý boiynsha shyǵystardy óteýge sýbsidiia qaralǵan. Qalaǵa qonys aýdarǵan bir adam 20 AEK (58340 teńge) mólsherinde kómek alsa, otbasy músheleriniń sany ekeýden tórteýge deiin bolsa, 25 AEK (72925 teńge) mólsherinde páteraqyǵa kómek beriledi. Aýyldyq jerge qonys aýdarǵan bir adam úshin 15 AEK (43755 teńge) mólsherinde páteraqy berilse, otbasy músheleriniń sany ekeýden tórteýge deiin bolǵan kezde 18 AEK (52506 teńge) mólsherinde qoldaǵýa ie bolady.
Osy jáne ózge de derekter sóz bolǵan jiynda 5 oblystyń áleýmettik salaǵa jaýapty basqarma basshylary men ókilderi óz pikirleri men usynystaryn aitty. Soltústik Qazaqstan oblystyq jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Rinat Eljasov óńirde 1000-nan astam bos jumys oryndary bar ekenin málimdedi. Pavlodar oblystyq jumyspen qamtýdy úilestirý jáne áleýmettik baǵdarlamalar basqarmasynyń bólim basshysy Merýert Esenbaeva jumysqa jaramdy qonystanýshylardyń 78 paiyzy turaqty jumyspen qamtylǵanyn aitty. Sonymen birge Qostanai, ShQO oblystarynyń jaýapty ókilderi de óz usynystaryn ortaǵa saldy. Ásirese, turǵyndardy baspanamen qamtýda másele bar ekeni sóz boldy. Olar osy saladaǵy ózekti máselelerdi tizbektep, QR Parlamenti Májilisiniń depýtattaryna usynýǵa ýaǵdalasty.
Jiyn nátijesinde aldaǵy ailarda aýdandyq, qalalyq «Jumyspen qamtý ortalyqtarynda» «Eńbek» baǵdarlamasy arqyly kóshkisi keletin azamattarǵa keńes beretin bólme ashý, otbasylardyń kóship-qonýyna kómektesetin demeýshiler tabý jáne otbasylardyń tizimin anyqtaý, aqparattyq jumysty kúsheitý jóninde sheshim qabyldandy. Sondai-aq ǵalamtorda Túrkistan oblysynyń kóshýge nietti turǵyndaryna arnalǵan ortaq aqparattyq keńistik qurý jóninde usynys berildi. «Nur Otan» partiiasynyń Túrkistan oblysyndaǵy barlyq filialdary ákimdiktermen birlesip, osy baǵytta jumys júrgizip, kóshi-qonǵa tikelei atsalysatyn boldy.
Búginde Soltústik óńirlerge qonystanǵandar sany boiynsha Túrkistan oblysynyń Jetisai, Maqtaaral, Saryaǵash, Keles, Qazyǵurt, Sairam aýdandary men Arys qalasy kósh bastap tur. Bul – osy aimaqtarda túsindirý, uiymdastyrý jumystary jolǵa qoiylǵanyn bildiredi.
Qazaqstan Respýblikasynyń Eńbek jáne halyqty áleýmettik qorǵaý ministrligi qandastar men qonys aýdarýshylardy qabyldaýdyń óńirlik kvotasyn bekitti. Osyǵan sáikes, 2021 jyly Aqmola, ShQO, Qostanai, Pavlodar SQO oblystaryna kóshý úshin 6039 adamǵa kvota bólingen.
