Zoom جۇيەسى ارقىلى وتكەن جيىنعا تۇركىستان، سقو، شقو، قوستاناي مەن پاۆلودار وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارمالارىنىڭ باسشىلارى مەن جاۋاپتى وكىلدەرى، تۇركىستان وبلىستىق ءماسليحاتىنىڭ دەپۋتاتتارى، جۇمىسپەن قامتۋ بولىمدەرىنىڭ باسشىلارى قاتىستى. ءماجىلىستىڭ مودەراتورى – «Nur Otan» پارتياسى تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى، وبلىستىق ءماسليحات دەپۋتاتى بەيسەنباي تاجىبايەۆ كوشى-قون سالاسى ستراتەگيالىق ماڭىزى بار ماسەلە ەكەنىن اتاپ ءوتتى.
«Nur Otan» پارتياسىنىڭ «وزگەرىستەر جولى: ءار ازاماتقا لايىقتى ءومىر!» سايلاۋالدى باعدارلاماسىندا وبلىس تۇرعىندارىنىڭ ءال-اۋقاتىن كوتەرۋ كوزدەلگەن. بۇل رەتتە ءوڭىر تۇرعىندارىن جۇمىس ورىندارى كوپ سولتۇستىك وڭىرلەرگە كوشۋىنە قولداۋ كورسەتۋ ارقىلى ەڭبەك رەسۋرستارىن ءتيىمدى ۇيلەستىرۋگە مۇمكىندىك مول. «جۇمىسپەن قامتۋدىڭ جول كارتاسى-2020» باعدارلاماسى جۇزەگە اسقان 5 جىلدا شقو، سقو، پاۆلودار جانە قوستاناي وبلىستارىنا 20 مىڭنان استام ادام قونىس اۋدارعان بولسا، ونىڭ 6 مىڭدايى نەمەسە 1700-دەي وتباسى – تۇركىستان وبلىسىنىڭ تۇرعىندارى. ءبىز كوشۋگە نيەت بىلدىرگەن ازاماتتارعا كومەكتەسۋ، وسى باعىتتا اقپاراتتىق جانە تۇسىندىرمە جۇمىستارىن جۇرگىزۋدى جانداندىرۋىمىز كەرەك. ءاربىر ازامات سولتۇستىككە قالاي كوشۋ كەرەكتىگىن، ولارعا مەملەكەتتەن قانداي قولداۋ بولاتىنىن ءبىلۋى ءتيىس»، – دەدى ب.تاجىبايەۆ.
كوشى-قون سالاسىنا ۇلەس قوسىپ جۇرگەن بەلسەندى ازامات «ەۆرورەمونت سەرۆيس» جشس-نىڭ ديرەكتورى جاڭاباي اعابەكوۆ «قونىستانۋشىلاردىڭ نەسيە قارىزىنا 6 ايعا دەيىن كانيكۋل بەرىلسە، وڭىرلەردىڭ ەرەكشەلىگىمەن تانىستىراتىن بەيىمدەۋ ورتالىقتارى اشىلسا، ءار اۋىلعا كەم دەگەندە 5-10 وتباسىنى بىرگە قونىستاندىرسا، كوش جاندانار ەدى. ءقازىردىڭ وزىندە تۇركىستان وبلىسىنان كوشۋگە نيەت ءبىلدىرىپ وتىرعان ازاماتتار جەتەرلىك»، – دەدى. ال تۇركىستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى نۇرجان نۇراشوۆ «ەڭبەك» باعدارلاماسى بويىنشا قونىستانۋشىلاردىڭ 30 پايىزى تۇركىستان وبلىسىنىڭ تۇرعىندارى ەكەنىن باياندادى. ونىڭ مالىمەتىنشە، اتقارىلعان جۇمىستار ناتيجەسىندە جىل باسىنان بەرى تۇركىستان وبلىسىنان 36 وتباسى، 117 ادام قونىس اۋدارعان. جالپى 5 جىل ىشىندە تۇركىستان وڭىرىنەن كوشكەندەردىڭ 2286-سى جۇمىسقا قابىلەتتى بولسا، ونىڭ 1545ء-ى تۇراقتى جۇمىسپەن قامتىلعان.
ەگەر سولتۇستىككە قونىس اۋدارساڭىز «ەڭبەك» باعدارلاماسى شەڭبەرىندە وتباسىنىڭ ءاربىر مۇشەسىنە 35 اەك (102095 تەڭگە) مولشەرىندە ماتەريالدىق قولداۋ كورسەتىلەدى. سونداي-اق ون ەكى اي ىشىندە تۇرعىن ءۇيدى جالداۋ بويىنشا شىعىستاردى وتەۋگە سۋبسيديا قارالعان. قالاعا قونىس اۋدارعان ءبىر ادام 20 اەك (58340 تەڭگە) مولشەرىندە كومەك السا، وتباسى مۇشەلەرىنىڭ سانى ەكەۋدەن تورتەۋگە دەيىن بولسا، 25 اەك (72925 تەڭگە) مولشەرىندە پاتەراقىعا كومەك بەرىلەدى. اۋىلدىق جەرگە قونىس اۋدارعان ءبىر ادام ءۇشىن 15 اەك (43755 تەڭگە) مولشەرىندە پاتەراقى بەرىلسە، وتباسى مۇشەلەرىنىڭ سانى ەكەۋدەن تورتەۋگە دەيىن بولعان كەزدە 18 اەك (52506 تەڭگە) مولشەرىندە قولداعۋا يە بولادى.
وسى جانە وزگە دە دەرەكتەر ءسوز بولعان جيىندا 5 وبلىستىڭ الەۋمەتتىك سالاعا جاۋاپتى باسقارما باسشىلارى مەن وكىلدەرى ءوز پىكىرلەرى مەن ۇسىنىستارىن ايتتى. سولتۇستىك قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى رينات ەلجاسوۆ وڭىردە 1000-نان استام بوس جۇمىس ورىندارى بار ەكەنىن مالىمدەدى. پاۆلودار وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى مەرۋەرت ەسەنبايەۆا جۇمىسقا جارامدى قونىستانۋشىلاردىڭ 78 پايىزى تۇراقتى جۇمىسپەن قامتىلعانىن ايتتى. سونىمەن بىرگە قوستاناي، شقو وبلىستارىنىڭ جاۋاپتى وكىلدەرى دە ءوز ۇسىنىستارىن ورتاعا سالدى. اسىرەسە، تۇرعىنداردى باسپانامەن قامتۋدا ماسەلە بار ەكەنى ءسوز بولدى. ولار وسى سالاداعى وزەكتى ماسەلەلەردى تىزبەكتەپ، ق ر پارلامەنتى ءماجىلىسىنىڭ دەپۋتاتتارىنا ۇسىنۋعا ۋاعدالاستى.
جيىن ناتيجەسىندە الداعى ايلاردا اۋداندىق، قالالىق «جۇمىسپەن قامتۋ ورتالىقتارىندا» «ەڭبەك» باعدارلاماسى ارقىلى كوشكىسى كەلەتىن ازاماتتارعا كەڭەس بەرەتىن بولمە اشۋ، وتباسىلاردىڭ كوشىپ-قونۋىنا كومەكتەسەتىن دەمەۋشىلەر تابۋ جانە وتباسىلاردىڭ ءتىزىمىن انىقتاۋ، اقپاراتتىق جۇمىستى كۇشەيتۋ جونىندە شەشىم قابىلداندى. سونداي-اق عالامتوردا تۇركىستان وبلىسىنىڭ كوشۋگە نيەتتى تۇرعىندارىنا ارنالعان ورتاق اقپاراتتىق كەڭىستىك قۇرۋ جونىندە ۇسىنىس بەرىلدى. «Nur Otan» پارتياسىنىڭ تۇركىستان وبلىسىنداعى بارلىق فيليالدارى اكىمدىكتەرمەن بىرلەسىپ، وسى باعىتتا جۇمىس جۇرگىزىپ، كوشى-قونعا تىكەلەي اتسالىساتىن بولدى.
بۇگىندە سولتۇستىك وڭىرلەرگە قونىستانعاندار سانى بويىنشا تۇركىستان وبلىسىنىڭ جەتىساي، ماقتاارال، سارىاعاش، كەلەس، قازىعۇرت، سايرام اۋداندارى مەن ارىس قالاسى كوش باستاپ تۇر. بۇل – وسى ايماقتاردا ءتۇسىندىرۋ، ۇيىمداستىرۋ جۇمىستارى جولعا قويىلعانىن بىلدىرەدى.
قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسىن بەكىتتى. وسىعان سايكەس، 2021 جىلى اقمولا، شقو، قوستاناي، پاۆلودار سقو وبلىستارىنا كوشۋ ءۇشىن 6039 ادامعا كۆوتا بولىنگەن.
