Búgin Túrkistanda aımaq basshysy Ómirzaq Shókeev alǵash ret kásipkerlermen beıresmı kezdesý ótkizdi. Onda kásipkerlik jáne aýyl sharýashylyq salalaryndaǵy máseleler talqylandy. Atap aıtqanda, aýyl sharýashylyq ónimderiniń kólemin arttyrý, qarqyndy baý sharýashylyǵyn damytý, aýyl sharýashylyq jerlerdi tıimdi paıdalaný, tamshylatyp sýarý júıeleri, bordaqylaý alańdary men sý qoımalaryn salý týraly máseleleri áńgime arqaýyna aınaldy.

Oblys ákimi óńirdi damytýǵa baǵyttalǵan kásipkerlerdiń bastamalary men jobalaryn qoldaýǵa daıyn ekendigin atap ótti.

– Memleket pen bıznestiń kúshin biriktirý arqyly ǵana kútiletin nátıjelerge qol jetkizýge bolady. Sizderdiń jumys barysyndaǵy barlyq usynystaryńyz ben pikirlerińiz mindetti túrde eskerilýi kerek. Biz sol úshin de jumys isteımiz. Biz kez-kelgen naqty qoldaý kórsetýge daıynbyz. Biraq, biz sizderdiń aımaqtyń damýyna qandaı úles qosa alatyndaryńyzǵa kóz jetkizýimiz kerek, – dedi Ómirzaq Estaıuly.

Sonymen qatar, oblys ákimi kásipkerlerdi óz ıdeıalary men jobalaryn belsendi túrde usynýǵa shaqyrdy. Kezdesý barysynda Ómirzaq Estaıuly oblys ortalyǵynyń damý josparlary týraly aıtty. Óńir basshysy Túrkistan qalasynda  sharýalardy qoldaýǵa arnalǵan arnaıy saýda úıi ashylatynyn jetkizdi. Sondaı-aq, oblys ákimi osyndaı sharalardy toqsan saıyn ótkizip turý týraly usynysyn bildirdi.

Óz kezeginde sharýalar shetelden keletin shıkizattardy jeńildetilgen baǵamen alyp, mamandar tapshylyǵyn sheshý qajettigin aıtty.

Jıyn sońynda oblys basshysy nátıjeli sheshim qabyldaý úshin barlyq aıtylǵan suraqtar egjeı-tegjeıli zertteletinin jetkizdi.

 

Túrkistan oblysy ákiminiń baspasóz qyzmeti