بۇگىن تۇركىستاندا ايماق باسشىسى ءومىرزاق شوكەيەۆ العاش رەت كاسىپكەرلەرمەن بەيرەسمي كەزدەسۋ وتكىزدى. وندا كاسىپكەرلىك جانە اۋىل شارۋاشىلىق سالالارىنداعى ماسەلەلەر تالقىلاندى. اتاپ ايتقاندا، اۋىل شارۋاشىلىق ونىمدەرىنىڭ كولەمىن ارتتىرۋ، قارقىندى باۋ شارۋاشىلىعىن دامىتۋ، اۋىل شارۋاشىلىق جەرلەردى ءتيىمدى پايدالانۋ، تامشىلاتىپ سۋارۋ جۇيەلەرى، بورداقىلاۋ الاڭدارى مەن سۋ قويمالارىن سالۋ تۋرالى ماسەلەلەرى اڭگىمە ارقاۋىنا اينالدى.

وبلىس اكىمى ءوڭىردى دامىتۋعا باعىتتالعان كاسىپكەرلەردىڭ باستامالارى مەن جوبالارىن قولداۋعا دايىن ەكەندىگىن اتاپ ءوتتى.

– مەملەكەت پەن بيزنەستىڭ كۇشىن بىرىكتىرۋ ارقىلى عانا كۇتىلەتىن ناتيجەلەرگە قول جەتكىزۋگە بولادى. سىزدەردىڭ جۇمىس بارىسىنداعى بارلىق ۇسىنىستارىڭىز بەن پىكىرلەرىڭىز مىندەتتى تۇردە ەسكەرىلۋى كەرەك. ءبىز سول ءۇشىن دە جۇمىس ىستەيمىز. ءبىز كەز-كەلگەن ناقتى قولداۋ كورسەتۋگە دايىنبىز. ءبىراق، ءبىز سىزدەردىڭ ايماقتىڭ دامۋىنا قانداي ۇلەس قوسا الاتىندارىڭىزعا كوز جەتكىزۋىمىز كەرەك، – دەدى ءومىرزاق ەستاي ۇلى.

سونىمەن قاتار، وبلىس اكىمى كاسىپكەرلەردى ءوز يدەيالارى مەن جوبالارىن بەلسەندى تۇردە ۇسىنۋعا شاقىردى. كەزدەسۋ بارىسىندا ءومىرزاق ەستاي ۇلى وبلىس ورتالىعىنىڭ دامۋ جوسپارلارى تۋرالى ايتتى. ءوڭىر باسشىسى تۇركىستان قالاسىندا  شارۋالاردى قولداۋعا ارنالعان ارنايى ساۋدا ءۇيى اشىلاتىنىن جەتكىزدى. سونداي-اق، وبلىس اكىمى وسىنداي شارالاردى توقسان سايىن وتكىزىپ تۇرۋ تۋرالى ۇسىنىسىن ءبىلدىردى.

ءوز كەزەگىندە شارۋالار شەتەلدەن كەلەتىن شيكىزاتتاردى جەڭىلدەتىلگەن باعامەن الىپ، ماماندار تاپشىلىعىن شەشۋ قاجەتتىگىن ايتتى.

جيىن سوڭىندا وبلىس باسشىسى ناتيجەلى شەشىم قابىلداۋ ءۇشىن بارلىق ايتىلعان سۇراقتار ەگجەي-تەگجەيلى زەرتتەلەتىنىن جەتكىزدى.

 

تۇركىستان وبلىسى اكىمىنىڭ باسپا ءسوز قىزمەتى