Semınar maqsaty – BAQ ókilderiniń saılaý zańdylyqtaryn turǵyndar arasynda keńinen nasıhattaý.
Osy oraıda atalǵan semınarǵa oblystyq saılaý komısıasy tóraǵasynyń orynbasary jáne BAQ ókilderi qatysty.
Aldymen sóz alǵan oblystyq saılaý komısıasy tóraǵasynyń orynbasary Ámirdın Álishev OSK tarapynan júrgizilip jatqan jumystarǵa toqtaldy.
Sondaı-aq semınarda Túrkistan oblystyq ishki saıasat basqarmasynyń basshysy Beısenbaı Tájibaev BAQ-da saılaýdy aqparattandyrý jónindegi zańdylyqty saqtaý boıynsha baıandama jasap, jýrnalıser qaýymyna saılaý naýqanynda BAQ ókilderiniń resmı tirkelý máselesin atap ótti.
– Elimizdegi mańyzdy qoǵamdyq-saıası prosesti BAQ muqıat qarap, belsendi túrde aqparat taratqany durys. Bul turǵydan birqatar redaksıalardyń belsendiligi ortasha deńgeıde qalyp otyr. Sondaı-aq qoǵam suranysyna oraı jańa medıa talabymen jumys júrgizý kerek. Aýdandyq jáne oblystyq BAQ ókilderi saılaýǵa deıin 7 jumys kúni buryn jeke kýáligin jáne jumys jasaıtyn redaksıasynyń saılaýǵa qatysty baǵyttamasyn alyp, ózderine tıisti saılaý komısıasyna baryp akredıtasıadan ótýi tıis. Arnaıy tirkeýden ótken tilshiler saılaý kúni ýchaskelerden aqparat tarata alady, – dedi B. Tájibaev
Kelesi kezekte sóz alǵan aqparattyq-taldaý ortalyǵynyń dırektory Seıdýlla Aıkózov saılaý taqyryby jóninde BAQ-na sholý jasady.
Jýrnalıser qaýymy jáne ákimdik ókilderiniń erkin formatta ózara pikir almasýynan soń QR Jýrnalıser Odaǵynyń Túrkistan oblystyq fılıalynyń tóraǵasy Ǵalymjan Elshibaı 28 maýsym – baılanys jáne aqparat qyzmetkerleri kúnine oraı ótkiziletin spartakıada týraly habarlama jasady. Bıyl jarysty 10 sport túri boıynsha oblys jáne Shymkent qalasynyń jýrnalıseri birlese ótkizýge kelisti. Spartakıadanyń ashylýy 14 maýsym kúni Túrkistanda bastalyp, 22 maýsym kúni Shymkentte qorytyndylanatyn bolady.
Jıyn sońynda oblys ákiminiń orynbasary M. Otarbaev elimizde maýsym aıynda ótetin QR Prezıdenttigine saılaýǵa jergilikti turǵyndardyń barynsha qatysýyn qamtamasyz etý jáne BAQ-da zańdylyqtardy qatań saqtaýǵa barshany belsene qatysýǵa shaqyrdy.
Túrkistan oblysy óńirlik komýnıkasıa qyzmeti
