Kitaptyń tusaýkeserine ardagerler, zıaly qaýym ókilderi, oqyrmandar, ǵalymdar men jýrnalıser jáne ózge de azamattar qatysty.
Mádenı sharany ashqan Túrkistan oblysynyń ákimi Janseıit Túımebaev «Rýhanı jańǵyrý» baǵdarlamasy aıasynda jaryq kórgen týyndylardyń mańyzdylyǵyna toqtalyp, kitaptyń qundylyǵy týraly tilge tıek etti.
«Elbasymyz «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý úshin tapsyrma bergen bolatyn. Mine, osyǵan oraı «Rýhanı jańǵyrý» baǵdarlamasy sheńberinde oblysymyzda 2 qundy kitap jaryq kórip, tusaýy kesilgeli tur. Bul eki kitap oqyrman úshin óte qajet dúnıeler. Biz óz tarıhymyz ben týǵan ólkemizdiń san ǵasyrdan beri kele jatqan shejiresin bilý arqyly ulttyq bolmysymyzdy, ulttyq kodymyzdy saqtaı alamyz. Bul kitaptar rýhanı jańǵyrý úshin óte mańyzdy. Qysqasy, mundaı kitaptar oqyrmanǵa jetip, rýhanı qazynadan árbir azamat sýsyndaýy tıis. Aldaǵy ýaqytta «Rýhanı jańǵyrý» baǵdarlamasy men «Uly dalanyń jeti qyry» maqalasyndaǵy tapsyrmalardy oryndaý baǵytyndaǵy jumystar jalǵasyn tabady», – dedi Janseıit Qanseıituly.
Úsh tilde shyǵarylyp otyrǵan «Ońtústik Qazaqstan oblysynyń tarıhı oryndary men kıeli jerleri» atty kitap-fotoalbomda Túrkistan oblysynyń tarıhı oryndary túgel kórsetilgen. Munda kıeli oryndar men eskertkishter týraly qazaq, aǵylshyn jáne orys tilderinde málimet berilip, sýrettermen kómkerilgen.
Al, «Ońtústik qasıetti oryndary: ańyz-ápsanalar» atty kitabynda Túrkistan oblysyndaǵy áýlıe-ámbıeler men el aýzyndaǵy tulǵalar týraly ańyzdar men áńgimeler jazylǵan. Bul kitapta kóne zamandardan syr shertetin ápsanalar men qyzyqty derekter mol.
Sonymen qatar, osy kúni «2017 jyl: aıshyqty oqıǵalar» atty kitap ta oqyrmanǵa jol tartty. Bul kitapta óńirdegi ótken jylǵy aıryqsha oqıǵalar jazylǵan.
Túrkistan oblysy ákiminiń baspasóz qyzmeti
