Túrkistan qalasynda Orta Aziiada teńdesi joq sport keshenderi bar «Eskek esý» arnasy ashyldy,- dep habarlaidy Dalanews.kz
Memleket basshysy Qasym-Jomart Kemeluly Qazaqstan halqyna arnaǵan Joldaýynda «sport infraqurylymyn damytý men jańa keshenderdi salý» jóninde naqty tapsyrmalar berdi. Osy baǵytta oblysta 112 sport nysanynyń qurylysy júrgizilýde. Bul tek infraqurylymdy damytý ǵana emes, jastardyń bolashaǵyna salynǵan investitsiia, turǵyndardyń salaýatty ómir saltyn qalyptastyrýǵa jasalǵan naqty qadam.
Biregei sport nysanynyń ashylý saltanatyna orai «Turkistan Water Fest & Sky Lights» atty aýqymdy mádeni-sporttyq is-shara ótti. Saltanatty sharaǵa arnaiy kelgen QR Týrizm jáne sport ministri E.Myrzabosynov, Esý sporty túrleri boiynsha «Qaiyq» federatsiiasy AQB prezidenti A.Merǵaliev, Baidarka men kanoe esý halyqaralyq federatsiiasynyń prezidenti T.Konietsko sóz alyp, óńir turǵyndaryna izgi tilegin jetkizdi.
Sonymen qatar mańyzdy sharaǵa Túrkistan oblysynyń ákimi Nuralhan Kósherov qatysyp, kópshilikti jańa nysannyń ashylýymen quttyqtady.
– Búgin biz úshin tarihi jáne qýanyshty kún. Elimizde alǵash ret halyqaralyq standartqa sai keletin «Eskek esý» kanalyn ashqaly turmyz. Túrkistanymyz túrki álemin tańǵaldyratyn taǵy da bir zamanaýi nysanmen tolyqqaly tur. Bul Memleket basshysynyń tikelei tapsyramasyna sáikes, tarihi Túrkistandy damytý baǵytyndaǵy júrgizilip jatqan naqty jumystardyń jemisi. Biyl Prezidentimiz «Túrkistan qalasynyń erekshe mártebesi týraly» arnaiy Zańǵa qol qoidy. Qabyldanǵan Zańda Túrkistan qalasynyń rýhani, tarihi-mádeni, týristik ortalyǵy jáne sáýlet murasy retindegi erekshe mártebesi bekitildi. Qasietti Túrkistandy rýhani ǵana emes, bilim men ǵylymnyń, mádeniet pen sporttyń ortalyǵyna ainaldyrý – memleketimizdiń basty maqsatynyń biri. Búgingi saltanat is-shara – sol maqsattyń aiqyn dáleli.«Eskek esý» kanalynyń ereksheliginiń biri – qalanyń ekojúiesine de tikelei áserin tigizedi. Keshende Aziialyq jáne álemdik deńgeidegi jarystardy uiymdastyrýǵa bolady. Shet eldik sportshylarǵa jyl on eki ai oqý-jattyǵý jiyndaryn ótkizýge tolyq múmkindik bar. Bul sport kesheni — Túrkistannyń ǵana emes, tutas qazaq eliniń abyroiyn kóteredi. «Eskek esý» kanalyny óńir sportynyń damýyna serpin berip qana qoimai, Túrkistannyń týristik áleýetin arttyrýǵa da zor úles qosady. Memleket basshysy «Elimizdiń keleshegi - oiy ushqyr, bilimi tereń, kózqarasy zamanaýi jastardyń qolynda» degen bolatyn. Endeshe, jastarymyz myqty bolsa – elimiz de qýatty bolady. Sondyqtan jastardy salaýatty ómir saltyn ustaýǵa, turaqty túrde sportpen ainalysýǵa shaqyramyn. Barshańyzdy Túrkistan qalasyndaǵy zamanaýi nysannyń ashylýymen shyn júrekten quttyqtaimyn! Bul sport ortalyǵynan bolashaq Olimpiada chempiondary shyǵa bersin! – dedi Nuralhan Oralbaiuly.
Búgin halyqaralyq baidarka jáne kanoe esý federatsiiasynyń prezidenti Tomas Konietsko men Qazaqstan Respýblikasy «Qaiyq» federatsiiasynyń prezidenti Aslanbek Mergaliev arasynda ekijaqty memorandýmǵa qol qoiyldy. Nátijesinde, Ortalyq Aziia memleketteri arasyndaǵy alǵashqy óńirlik hab qurylmaq.
«Eskek esý» kanalynda 500-ge jýyq sportshy baidarka men kanoeda esý, akademiialyq esý, triatlon, parakanoe, ashyq sýda júzý siiaqty sport túrlerimen turaqty túrde jattyǵa alady. Oblystyń eskek esýshileri el abyroiyn kóterýde. Osy ýaqytqa deiin Qazaqstan Respýblikasynyń chempionattary men kýboktarynda 1 800-den astam medal ielense (406 altyn, 730 kúmis, 676 qola), Álem jáne Aziia chempionattarynda 184 medal qanjylady (58 altyn, 84 kúmis, 42 qola). Olimpiada oiyndaryna 9 litsenziia alyndy.
Bul kúni Sh.Qaldaiaqov atyndaǵy oblystyq filarmoniianyń kontserttik baǵdarlamasy usynyldy. Merekelik keshti Dinara Sátjan, Erkebulan Myrzabek, Marat Oralǵazin júrgizdi. Keshtiń ajaryn Muqasan Shahzadaev, Marhaba Sábi, Kalifarniia, Aqsuńqar, DJ Macarello, Túrkistan mýzykalyq teatry bishileri, «Tańba» etno toby jáne «Samǵaý» bi ansambli ashyp, ónerlerin pash etti.
Sonymen qatar oblys ortalyǵynda merekelik atmosfera ornap, myń buralǵan bishiler, animatorlar men tsirk ónerpazdary keshendi aralap, kelýshilerdiń kóńil kóterdi. «Taiqazan» ulttyq taǵamdardyń gastronomiialyq jármeńkesi, qolónershiler kórmesi, áýe sharlary shoýy, kreativti fotozonalar, 10-ǵa jýyq master-klass, oiyn-saýyq aimaqtary uiymdastyrylyp, sý ústindegi sporttyq oiyndar men qoiylymdar, flaibord shoýy, lazerli jáne fontan shoýlary, merekelik otshashý kópshiliktilikti tánti etti.
Osy kúni oblys basshysy «Eskek esý» arnasynyń jattyǵý zalyn aralap, qolónershiler kórmesi men «Taiqazan» gastrofestivalin tamashalady.
Eske salaiyq, biyl 102 sport nysany paidalanýǵa tapsyryldy. Kelesi jyly 10 sport ǵimaratyn tapsyrý josparlanýda. Oblystaǵy erekshe qajettiligi bar azamattardy salaýattylyqqa tartý maqsatynda beiimdelgen 22 sport sektsiiasy ashyldy. Túrkistanda zamanaýi «Túrkistan arena» stadiony, halyqaralyq tennis ortalyǵy jáne Bekzat Sattarhanov atyndaǵy sport kesheni qyzmet etýde. Budan bólek, qysqy sport túrlerin damytý maqsatynda «Muz saraiy» ashyldy. Oblys tarihynda alǵash ret shaibaly hokkei, mánerlep syrǵanaý jáne short-trek úiirmelerimen 400-den astam jasóspirim ainalysýda. Sonymen qatar Túrkistan qalasynda atshabar kesheniniń qurylysy qarqyndy júrgizilýde. Bul nysan at sporty túrlerin damytýǵa, ulttyq dástúrdi jańǵyrtýǵa zor múmkindik beredi.
