Aimaqqa investitsiia tartyp, jergilikti ónimderdi eksportqa shyǵarýdy maqsat etken is-sharada jalpy sany 60-qa jýyq taýar óndirýshiniń ónimderi qoiylǵan. Atap aitqanda, kiim, aiaq kiim, ydystar, tekstil ónimderi, elektr mashinalary, kúnnen qorǵaityn ónimder, elektr skýterleri jáne Túrkistan oblysy boiynsha tamaq, jihaz, himiia, jeńil ónerkásip ónimderi usynyldy.
– Bul kórmeniń Túrkistan oblysynda ótýiniń mańyzy joǵary. Oǵan dálel retinde eki eldiń kóptegen ortaq bastamalaryn aitýǵa bolady. Saýda-ekonomikalyq jáne mádeni-gýmanitarlyq qatynastardy damytý turǵysynan Qytai Halyq Respýblikasy Túrkistan oblysynyń mańyzdy jáne senimdi seriktesi bolyp tabylady. Ózara yntymaqtastyqtyń arqasynda eki el arasyndaǵy taýar ainalymy ósti.
Túrkistan óńiri elimizdiń qarqyndy damyp kele jatqan óńirlerdiń biri jáne orasan zor investitsiialyq jáne týristik áleýetke ie. Memleketterimiz arasyndaǵy ekonomikalyq bailanystardy damytýǵa serpin beretin ózara investitsiiany ulǵaitý arqyly yntymaqtastyqty odan ári nyǵaitýǵa shaqyramyn. Tarihi Uly Jibek jolynyń júreginde ornalasqan Túrkistan oblysynda qytailyq kompaniialardyń bastamalaryna tolyq qoldaý kórsetiledi, – dedi Darhan Amangeldiuly.
«Bir beldeý, bir jol» jobasy aiasynda ekijaqty saýda bailanysyn arttyrý maqsatynda ótken kórmede Qytaidyń «Ilýtýn» dep atalatyn onlain-platformasy tanystyryldy. Ilýtýn – bul transshekaralyq onlain kóterme saýda dúkeni. Onda barlyq turmysqa qajetti zattardy tikelei óndirýshiden satyp alýǵa múmkindik bar. Logistika jaǵynan da jyldam jetkizý tásilderi qarastyrylǵan.
Búgingi tańda bul platformadan 500-den asa zaýytty taýyp, taýarlar jaily aqparatty úsh tilde (qytai, aǵylshyn, orys) alýǵa bolady. Arada deldaldarsyz tikelei zaýytpen bailanysyp, qol jetkizý qarastyrylǵan.
Odan ózge, kórme aiasynda ekijaqty bailanysty damytyp, birlesken jobalar ashyp, tájiribemen bólisý boiynsha Memorandýmdarǵa qol qoiylady.
Atap aitqanda, aýyl sharýashylyǵy tehnikalaryn qurastyrý, kabel jelisin jasaý, elektr kólikterin zariadtaý stantsiialary, tigin fabrikasyn ashý boiynsha jalpy somasy 3 mlrd-tan astam qarjyǵa kásiporyndar ashý boiynsha Indýstrialdy aimaq jáne Arnaiy ekonomikalyq aimaq basshylyǵymen memorandýmdar túzildi.
Esterińizge salsaq, buǵan deiin oblys ákimi Darhan Satybaldy Qytaiǵa jumys sapary kezinde eki eldiń, onyń ishinde Túrkistan oblysynda óńdeý ónerkásibi, avtomobilder jasaý, plastmassadan buiymdar jasaý, robototehnika t. b óndiristi damytýda birqatar iri investitsiialyq kompaniialardyń ókilderimen kezdesip, áriptestik jóninde kelissózder júrgizgen bolatyn.
Bul kezdesýler nátijesin berip, jaqyn kúnde Túrkistan qalasynyń Indýstrialdy aimaǵyndaǵy daiyn óndiris alańynda (brownfield) qazaq-qytai birlesýimen shulyq jáne erler kostiýmin shyǵaratyn zaýyt ashylmaq. Mundai iri kásiporyndar arqyly jańa jumys oryndaryn ashyp, jergilikti turǵyndardy jumyspen qamtý máselesi basty nazarǵa alynǵan.
Túrkistan oblysy arqyly ótetin «Batys Qytai – Batys Eýropa» halyqaralyq kólik dálizi – álemdik naryqqa shyǵýdyń iri kózi. Oblystan myń shaqyrym radiýsta 70 millionnan astam adam turady. Túrkistan oblysynyń salalyq mamandanýyn, sondai-aq ekonomikany damytýdyń basym baǵyttaryn eskere otyryp, Túrkistan oblysynyń ákimi Darhan Satybaldynyń tapsyrmasymen aýyl sharýashylyǵy, óńdeý ónerkásibi, jer qoinaýyn paidalaný, týrizm, sondai-aq jańartylatyn energiia kózderi siiaqty salalarǵa investitsiia tartý boiynsha jumystar júrgizilýde.
