ايماققا ينۆەستيسيا تارتىپ، جەرگىلىكتى ونىمدەردى ەكسپورتقا شىعارۋدى ماقسات ەتكەن ءىس-شارادا جالپى سانى 60-قا جۋىق تاۋار ءوندىرۋشىنىڭ ونىمدەرى قويىلعان. اتاپ ايتقاندا، كيىم، اياق كيىم، ىدىستار، تەكستيل ونىمدەرى، ەلەكتر ماشينالارى، كۇننەن قورعايتىن ونىمدەر، ەلەكتر سكۋتەرلەرى جانە تۇركىستان وبلىسى بويىنشا تاماق، جيھاز، حيميا، جەڭىل ونەركاسىپ ونىمدەرى ۇسىنىلدى.
– بۇل كورمەنىڭ تۇركىستان وبلىسىندا ءوتۋىنىڭ ماڭىزى جوعارى. وعان دالەل رەتىندە ەكى ەلدىڭ كوپتەگەن ورتاق باستامالارىن ايتۋعا بولادى. ساۋدا-ەكونوميكالىق جانە مادەني-گۋمانيتارلىق قاتىناستاردى دامىتۋ تۇرعىسىنان جۇڭگو حالىق رەسپۋبليكاسى تۇركىستان وبلىسىنىڭ ماڭىزدى جانە سەنىمدى سەرىكتەسى بولىپ تابىلادى. ءوزارا ىنتىماقتاستىقتىڭ ارقاسىندا ەكى ەل اراسىنداعى تاۋار اينالىمى ءوستى.
تۇركىستان ءوڭىرى ەلىمىزدىڭ قارقىندى دامىپ كەلە جاتقان وڭىرلەردىڭ ءبىرى جانە وراسان زور ينۆەستيسيالىق جانە تۋريستىك الەۋەتكە يە. مەملەكەتتەرىمىز اراسىنداعى ەكونوميكالىق بايلانىستاردى دامىتۋعا سەرپىن بەرەتىن ءوزارا ينۆەستيسيانى ۇلعايتۋ ارقىلى ىنتىماقتاستىقتى ودان ءارى نىعايتۋعا شاقىرامىن. تاريحي ۇلى جىبەك جولىنىڭ جۇرەگىندە ورنالاسقان تۇركىستان وبلىسىندا قىتايلىق كومپانيالاردىڭ باستامالارىنا تولىق قولداۋ كورسەتىلەدى، – دەدى دارحان امانگەلدى ۇلى.
«ءبىر بەلدەۋ، ءبىر جول» جوباسى اياسىندا ەكىجاقتى ساۋدا بايلانىسىن ارتتىرۋ ماقساتىندا وتكەن كورمەدە قىتايدىڭ «يلۋتۋن» دەپ اتالاتىن ونلاين-پلاتفورماسى تانىستىرىلدى. يلۋتۋن – بۇل ترانسشەكارالىق ونلاين كوتەرمە ساۋدا دۇكەنى. وندا بارلىق تۇرمىسقا قاجەتتى زاتتاردى تىكەلەي وندىرۋشىدەن ساتىپ الۋعا مۇمكىندىك بار. لوگيستيكا جاعىنان دا جىلدام جەتكىزۋ تاسىلدەرى قاراستىرىلعان.
بۇگىنگى تاڭدا بۇل پلاتفورمادان 500-دەن اسا زاۋىتتى تاۋىپ، تاۋارلار جايلى اقپاراتتى ءۇش تىلدە (جۇڭگو، اعىلشىن، ورىس) الۋعا بولادى. ارادا دەلدالدارسىز تىكەلەي زاۋىتپەن بايلانىسىپ، قول جەتكىزۋ قاراستىرىلعان.
ودان وزگە، كورمە اياسىندا ەكىجاقتى بايلانىستى دامىتىپ، بىرلەسكەن جوبالار اشىپ، تاجىريبەمەن ءبولىسۋ بويىنشا مەموراندۋمدارعا قول قويىلادى.
اتاپ ايتقاندا، اۋىل شارۋاشىلىعى تەحنيكالارىن قۇراستىرۋ، كابەل جەلىسىن جاساۋ، ەلەكتر كولىكتەرىن زاريادتاۋ ستانسيالارى، تىگىن فابريكاسىن اشۋ بويىنشا جالپى سوماسى 3 ملرد-تان استام قارجىعا كاسىپورىندار اشۋ بويىنشا يندۋستريالدى ايماق جانە ارنايى ەكونوميكالىق ايماق باسشىلىعىمەن مەموراندۋمدار ءتۇزىلدى.
ەستەرىڭىزگە سالساق، بۇعان دەيىن وبلىس اكىمى دارحان ساتىبالدى قىتايعا جۇمىس ساپارى كەزىندە ەكى ەلدىڭ، ونىڭ ىشىندە تۇركىستان وبلىسىندا وڭدەۋ ونەركاسىبى، اۆتوموبيلدەر جاساۋ، پلاستماسسادان بۇيىمدار جاساۋ، روبوتوتەحنيكا ت. ب ءوندىرىستى دامىتۋدا ءبىرقاتار ءىرى ينۆەستيسيالىق كومپانيالاردىڭ وكىلدەرىمەن كەزدەسىپ، ارىپتەستىك جونىندە كەلىسسوزدەر جۇرگىزگەن بولاتىن.
بۇل كەزدەسۋلەر ناتيجەسىن بەرىپ، جاقىن كۇندە تۇركىستان قالاسىنىڭ يندۋستريالدى ايماعىنداعى دايىن ءوندىرىس الاڭىندا (brownfield) قازاق-قىتاي بىرلەسۋىمەن شۇلىق جانە ەرلەر كوستيۋمىن شىعاراتىن زاۋىت اشىلماق. مۇنداي ءىرى كاسىپورىندار ارقىلى جاڭا جۇمىس ورىندارىن اشىپ، جەرگىلىكتى تۇرعىنداردى جۇمىسپەن قامتۋ ماسەلەسى باستى نازارعا الىنعان.
تۇركىستان وبلىسى ارقىلى وتەتىن «باتىس جۇڭگو – باتىس ەۋروپا» حالىقارالىق كولىك ءدالىزى – الەمدىك نارىققا شىعۋدىڭ ءىرى كوزى. وبلىستان مىڭ شاقىرىم راديۋستا 70 ميلليوننان استام ادام تۇرادى. تۇركىستان وبلىسىنىڭ سالالىق ماماندانۋىن، سونداي-اق ەكونوميكانى دامىتۋدىڭ باسىم باعىتتارىن ەسكەرە وتىرىپ، تۇركىستان وبلىسىنىڭ اكىمى دارحان ساتىبالدىنىڭ تاپسىرماسىمەن اۋىل شارۋاشىلىعى، وڭدەۋ ونەركاسىبى، جەر قويناۋىن پايدالانۋ، تۋريزم، سونداي-اق جاڭارتىلاتىن ەنەرگيا كوزدەرى سياقتى سالالارعا ينۆەستيسيا تارتۋ بويىنشا جۇمىستار جۇرگىزىلۋدە.
