Qazaqstan azamaty Aqjarqyn Turlybaidyń Qytaida qamaýda otyrǵanyna on jyldan astam ýaqyt ótti. Ol 2014 jyldyń kókteminde Gýanchjoý áýejaiynda ustalyp, júginen 4,5 keli amfetamin tabylǵannan keiin aiyptalǵan, dep habarlaidy dalanews.kz.
Qytai soty qazaqstandyq stýdentke ómir boiyna bas bostandyǵynan aiyrý jazasyn kesken. Alaida qorǵaýshy tarap onyń aldanǵanyn jáne halyqaralyq esirtki tobynyń qurbany bolǵanyn alǵa tartady.
Istiń bastalýy
Aqjarqyn Turlybai 1994 jyly Túrkistan oblysy Maqtaaral aýdanynda dúniege kelgen. Mektepti aiaqtaǵannan keiin pedagogikalyq ýniversitetke túsip, Almatyǵa qonys aýdarǵan.
21 jastaǵy stýdent qurbysy Dinaramen birge turǵan. Qurbysy Qytaidan kiim ákelip satýmen ainalysqan, al Aqjarqyn da osy iske qyzyǵýshylyq tanytyp, 2014 jyldyń naýryz aiynda Qytaiǵa alǵash ret sapar shekken.
Alǵashqy ýaqytta ol ata-anasymen bailanysta bolǵanymen, kóp uzamai habar úzilip, keiin onyń Gýanchjoý áýejaiynda esirtki tasymaldady degen kúdikpen ustalǵany belgili boldy.
Chemodandaǵy júk
Qorǵaýshylardyń aitýynsha, Nigeriia azamaty Adindý Nonso Fortýna Aqjarqynǵa Malaiziiaǵa áielder kiimi salynǵan chemodandy jetkizýdi ótingen. Alaida kedendik tekseris kezinde sol júkten 4,5 keli amfetamin tabylǵan.
Boijetken qamaýǵa alynyp, bir jyldan keiin sot úkimimen ómir boiyna bas bostandyǵynan aiyryldy.
Aiypty moiyndamaidy
Aqjarqyn óz kinásin moiyndamaidy. Ol chemodanda esirtki bar ekenin bilmegenin aitady. Onyń advokaty Suńqar Nurmaǵambetov te stýdenttiń halyqaralyq esirtki jelisiniń qurbany bolýy múmkin ekenin málimdegen.
Uqsas jaǵdailar basqa TMD elderi azamattarynda da tirkelgeni aitylyp, Resei azamaty Mariia Dapirkanyń isi mysal retinde keltiriledi.
On jyldan astam qamaýda
Aqjarqynnyń otbasy qorǵaý jumystaryna jáne saparlarǵa ketetin shyǵyndy óteý úshin múlkin satýǵa májbúr bolǵan. Anasynyń aitýynsha, Qytai túrmesinde sottalǵandar keibir qyzmetter úshin qosymsha aqy tóleidi.
Osy jyldar ishinde Aqjarqyn qytai tilin meńgerip, túrmede ioga jáne aǵylshyn tili sabaqtaryn ótkizgeni de aitylady.
Elge qaitarý máselesi
Qazaqstandyq diplomattar men qorǵaýshylar ekstraditsiia máselesin birneshe ret kótergenimen, Qytai tarapy ómir boiyna sottalǵan tulǵany berýden bas tartyp keledi.
Degenmen, eger jazanyń túri jeńildetilse, ony Qazaqstanǵa aýystyrý múmkindigi týyndaýy yqtimal. QR Syrtqy ister ministrligi 2025 jyly bul baǵytta jumys jalǵasyp jatqanyn habarlaǵan. Qazir is Bas prokýratýra qaraýynda.
Sonymen qatar, Qazaqstan tarapy esirtki tasymaldady degen kúdikke ilingen Nigeriia azamatyn da ekstraditsiialaý máselesin kóterip otyr.
