Búgin Túrkistan oblystyq qoǵamdyq densaýlyq basqarmasynyń ǵımaratynda osy jobalar resmı túrde bastaldy. Qoǵamdyq densaýlyq basqarmasyna Túrkıadan ákelingen eki jasandy tynys alý apparaty usynylsa, 20-dan astam naýqasqa shaldyqqan muqtaj otbasylarǵa dári-dármek tapsyryldy. Apparatty jetkizýge atsalysqan Qazaqstannyń Túrkıadaǵy elshiligi men elshisi Abzal Saparbekulyna alǵys aıtyldy.
«O2mir» jobasynyń maqsaty – qazir elimizde tapshy bolyp otyrǵan ottegi apparattaryn shet memleketterden óńirimizdegi emhanalarǵa jetkizý. Al «Shipa» jobasy arqyly orta deńgeıdegi dári-dármekter qorapshasyn daıyndap, ony aýyl-aýdandardaǵy áleýmettik jaǵdaıy tómen jáne de az qamtylǵan kópbalaly otbasylarǵa otbasylarǵa taratý kózdelgen.
Osy jobalardy júzege asyrý úshin el janashyrlary, oblystyq máslıhattaǵy «Nur Otan» partıasynyń fraksıa ókilderi men ózge de azamattar qoldaý kórsetti.
Qazirdiń ózinde qorǵa 10 mıllıon teńgeden astam qarjy jınaldy. Bul qarjynyń bir bóligine Túrkıa jáne Qytaı elderine 50 jasandy tynys alý apparatyna tapsyrys berilip, olar aldaǵy aptada óńirge jetkiziledi. Sonymen birge ázirge 300 dári-dármek qorapshasyn elge taratý kózdelgen. Árbir dári qorapshasynyń quny 14-15 myń teńge kóleminde. Qorapsha ishinde Túrkistan oblysy qoǵamdyq densaýlyq basqarmasy tarapynan usynylǵan, qazir beleń alyp otyrǵan koronavırýs pen pnevmanıa syrqattarynyń aldyn alýǵa, emdelýge arnalǵan dáriler men quraldar bar.
Alǵashqy eki jasandy tynys alý apparatyn alýǵa demeýshilik kórsetken «Nur Otan» partıasynyń Túrkistan oblystyq fılıaly tóraǵasynyń birinshi orynbasary Beısenbaı Tájibaev bul jobalar óńirdegi jas eriktilerdi ıgi iske jumyldyryp otyrǵanyn jetkizdi.
– Qazir elimizde koronavırýs indeti keń taralyp, el qınalyp jatyr. Naýqastar sany da artyp keledi. Túrkistan oblysynda COVID-19 rastalǵan naýqastar sany 2370-ten asty. Ókinishke qaraı, jasandy tynys alý apparattary men dári-dármek jetispeýshiligi de baıqalyp otyr. Sondyqtan da partıa bastamasymen óńirdiń belsendi jastarynan quralǵan «Jas Turkistan» eriktiler qozǵalysy qurylyp, osy jobalardy bastap ketti.
Oblystyq qoǵamdyq densaýlyq basqarmasymen de birlesip atqarylady. Bul ıgi bastamaǵa partıa ókilderi, máslıhat depýtattary qoldaý kórsetip jatyr. Pandemıamen kúreste, muqtaj otbasylarǵa kómektesýde atalǵan jobalar tıimdiligin kórsetedi dep senemin. Osy qıyn kezeńde elge kómektesýge barsha azamattardy atsalysýǵa shaqyramyz, – dedi B.Tájibaev.
Jalpy bul jobaǵa qazir oblystyq máslıhat depýtattary – Nuraly Ábish (5 mln teńge), Almas Salımov (1 mln teńge), Jańabaı Aǵabekov (1 mln teńge), Maǵaýıa Turysbekov (875 myń teńge), Qaınar Abbasov (767 myń teńge), Baımahan Súleımenov (200 myń teńge) aýdardy.
Sonymen birge Jazıra Ydyrysova (1 mln. 50 myń teńge) men Inara Namazbaeva (400 myń teńge) syndy el janashyrlary da qarjylaı qoldaý kórsetip otyr.
Óńirdegi volonter jastar sonymen birge aýrýhanalardaǵy naýqastarǵa saýmal men qymyz jáne azyq-túlik jetkizýdi qolǵa aldy.
Túrkistan oblystyq «Jastar resýrstyq ortalyǵynyń» dırektory Amalbek Ómirtaı men «Jas Otan» jastar qanatynyń Túrkistan oblystyq fılıalynyń tóraǵasy Janserik Juman jobalardy júzege asyrýǵa aýyl-aımaqtardaǵy jastar da úles qosatynyna senim bildirip, saýapty is tutas oblysty qamtıtynyn jetkizdi.
«Nur Otan» partıasynyń Túrkistan oblystyq fılıalynyń baspasóz qyzmeti
