بۇگىن تۇركىستان وبلىستىق قوعامدىق دەنساۋلىق باسقارماسىنىڭ عيماراتىندا وسى جوبالار رەسمي تۇردە باستالدى. قوعامدىق دەنساۋلىق باسقارماسىنا تۇركيادان اكەلىنگەن ەكى جاساندى تىنىس الۋ اپپاراتى ۇسىنىلسا، 20-دان استام ناۋقاسقا شالدىققان مۇقتاج وتباسىلارعا دارى-دارمەك تاپسىرىلدى. اپپاراتتى جەتكىزۋگە اتسالىسقان قازاقستاننىڭ تۇركياداعى ەلشىلىگى مەن ەلشىسى ابزال ساپاربەكۇلىنا العىس ايتىلدى.
«و2mir» جوباسىنىڭ ماقساتى – ءقازىر ەلىمىزدە تاپشى بولىپ وتىرعان وتتەگى اپپاراتتارىن شەت مەملەكەتتەردەن وڭىرىمىزدەگى ەمحانالارعا جەتكىزۋ. ال «Shipa» جوباسى ارقىلى ورتا دەڭگەيدەگى دارى-دارمەكتەر قوراپشاسىن دايىنداپ، ونى اۋىل-اۋداندارداعى الەۋمەتتىك جاعدايى تومەن جانە دە از قامتىلعان كوپبالالى وتباسىلارعا وتباسىلارعا تاراتۋ كوزدەلگەن.
وسى جوبالاردى جۇزەگە اسىرۋ ءۇشىن ەل جاناشىرلارى، وبلىستىق ءماسليحاتتاعى «Nur Otan» پارتياسىنىڭ فراكسيا وكىلدەرى مەن وزگە دە ازاماتتار قولداۋ كورسەتتى.
ءقازىردىڭ وزىندە قورعا 10 ميلليون تەڭگەدەن استام قارجى جينالدى. بۇل قارجىنىڭ ءبىر بولىگىنە تۇركيا جانە جۇڭگو ەلدەرىنە 50 جاساندى تىنىس الۋ اپپاراتىنا تاپسىرىس بەرىلىپ، ولار الداعى اپتادا وڭىرگە جەتكىزىلەدى. سونىمەن بىرگە ازىرگە 300 دارى-دارمەك قوراپشاسىن ەلگە تاراتۋ كوزدەلگەن. ءاربىر ءدارى قوراپشاسىنىڭ قۇنى 14-15 مىڭ تەڭگە كولەمىندە. قوراپشا ىشىندە تۇركىستان وبلىسى قوعامدىق دەنساۋلىق باسقارماسى تاراپىنان ۇسىنىلعان، ءقازىر بەلەڭ الىپ وتىرعان كوروناۆيرۋس پەن پنيەۆمانيا سىرقاتتارىنىڭ الدىن الۋعا، ەمدەلۋگە ارنالعان دارىلەر مەن قۇرالدار بار.
العاشقى ەكى جاساندى تىنىس الۋ اپپاراتىن الۋعا دەمەۋشىلىك كورسەتكەن «Nur Otan» پارتياسىنىڭ تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەنباي تاجىبايەۆ بۇل جوبالار وڭىردەگى جاس ەرىكتىلەردى يگى ىسكە جۇمىلدىرىپ وتىرعانىن جەتكىزدى.
– ءقازىر ەلىمىزدە كوروناۆيرۋس ىندەتى كەڭ تارالىپ، ەل قينالىپ جاتىر. ناۋقاستار سانى دا ارتىپ كەلەدى. تۇركىستان وبلىسىندا COVID-19 راستالعان ناۋقاستار سانى 2370-تەن استى. وكىنىشكە قاراي، جاساندى تىنىس الۋ اپپاراتتارى مەن دارى-دارمەك جەتىسپەۋشىلىگى دە بايقالىپ وتىر. سوندىقتان دا پارتيا باستاماسىمەن ءوڭىردىڭ بەلسەندى جاستارىنان قۇرالعان «Jas Turkistan» ەرىكتىلەر قوزعالىسى قۇرىلىپ، وسى جوبالاردى باستاپ كەتتى.
وبلىستىق قوعامدىق دەنساۋلىق باسقارماسىمەن دە بىرلەسىپ اتقارىلادى. بۇل يگى باستاماعا پارتيا وكىلدەرى، ءماسليحات دەپۋتاتتارى قولداۋ كورسەتىپ جاتىر. پاندەميامەن كۇرەستە، مۇقتاج وتباسىلارعا كومەكتەسۋدە اتالعان جوبالار تيىمدىلىگىن كورسەتەدى دەپ سەنەمىن. وسى قيىن كەزەڭدە ەلگە كومەكتەسۋگە بارشا ازاماتتاردى اتسالىسۋعا شاقىرامىز، – دەدى ب.تاجىبايەۆ.
جالپى بۇل جوباعا ءقازىر وبلىستىق ءماسليحات دەپۋتاتتارى – نۇرالى ءابىش (5 ملن تەڭگە)، الماس ساليموۆ (1 ملن تەڭگە)، جاڭاباي اعابەكوۆ (1 ملن تەڭگە)، ماعاۋيا تۇرىسبەكوۆ (875 مىڭ تەڭگە)، قاينار ابباسوۆ (767 مىڭ تەڭگە)، بايماحان سۇلەيمەنوۆ (200 مىڭ تەڭگە) اۋداردى.
سونىمەن بىرگە جازيرا ىدىرىسوۆا (1 ملن. 50 مىڭ تەڭگە) مەن ينارا نامازبايەۆا (400 مىڭ تەڭگە) سىندى ەل جاناشىرلارى دا قارجىلاي قولداۋ كورسەتىپ وتىر.
وڭىردەگى ۆولونتەر جاستار سونىمەن بىرگە اۋرۋحانالارداعى ناۋقاستارعا ساۋمال مەن قىمىز جانە ازىق-تۇلىك جەتكىزۋدى قولعا الدى.
تۇركىستان وبلىستىق «جاستار رەسۋرستىق ورتالىعىنىڭ» ديرەكتورى امالبەك ءومىرتاي مەن «Jas Otan» جاستار قاناتىنىڭ تۇركىستان وبلىستىق فيليالىنىڭ ءتوراعاسى جانسەرىك جۇمان جوبالاردى جۇزەگە اسىرۋعا اۋىل-ايماقتارداعى جاستار دا ۇلەس قوساتىنىنا سەنىم ءبىلدىرىپ، ساۋاپتى ءىس تۇتاس وبلىستى قامتيتىنىن جەتكىزدى.
«Nur Otan» پارتياسىنىڭ تۇركىستان وبلىستىق فيليالىنىڭ باسپا ءسوز قىزمەتى
