Shańyraqtyń bereke-birligin nasıhattaǵan mereıli sharada sóz alǵan Túrkistan oblysy Qoǵamdyq damý basqarmasynyń basshysy Ańsar Óserbaev jeńimpazdardy arnaıy quttyqtap, baıqaýda belsendilik tanytqan barlyq otbasyǵa alǵysyn bildirdi.
– Dana halqymyz «Otan – otbasynan bastalady» degen ulaǵatty sózdi tekke aıtpaǵan. Otbasy qaı zamanda bolsyn myqty memlekettiń negizi bolyp sanalady. Bıyl ulttyq baıqaýǵa qatysý úshin Túrkistan oblysynan 116 otbasy ótinish bildirdi. Oblystaǵy barlyq aýdan, qalalarda uıymdastyrylǵan baıqaýdyń alǵashqy kezeńinde 26 otbasy jeńimpaz atandy. Arnaıy komısıanyń sheshimimen otbasylar anyqtalyp, júldeler men syılyqtar beriledi. Sharanyń basty maqsaty – otbasy qundylyqtaryn dáripteý jáne ár aýdannan kelgen túrli salada júrgen otbasylardy jas býynǵa úlgi retinde kórsetý, – dedi Ańsar Jańabaıuly.
Ádilqazylardyń sheshimi boıynsha baıqaýdyń bas júldesin 4 ul, 3 qyz dúnıege ákelip, 31 nemere, 25 shóbere ósirgen Túrkistan qalasynyń Qulbaıymbetovter otbasy ıelendi. Áýlettiń tiregi 81 jastaǵy zeınetker Jarqynbek Qulbaıymbetov 40 jyl muǵalim qyzmetin atqarǵan.
İİ oryndy 7 ul, 1 qyz dúnıege ákelip, 33 nemere ósirgen Tólebı aýdanynan Ájibaevtar otbasy laıyq dep tanyldy.
Al İİİ oryndy 8 ul-qyz ósirip, etnosaralyq kelisim men birlikti nyǵaıtýǵa eleýli eńbek sińirip júrgen Saıram aýdanynyń turǵyndary Ilhamjanovtar otbasy ıelendi.
Shara barysynda basqarma basshysy jeńimpaz jáne júldeger otbasylardy Alǵys hattar jáne sertıfıkattarmen marapattady. Sondaı-aq baıqaýda baq synaǵan 23 otbasyǵa yntalandyrý syılyqtary tabystaldy.
