Qoiylymnyń ashylý saltanatynda oblys ákimi Janseiit Túimebaev quttyqtaý sózin arnap, teatr ujymyna shyǵarmashylyq tabystar tiledi.
– Premerany tamashalaýǵa qala turǵyndarynyń ásirese jastardyń kóptep kelýi kóńilge qýanysh syilaidy. Bul halqymyzdyń tyń dúniege qyzyǵýshylyq tanytyp mádenietimizdiń órkendegeniniń dáleli ispetti. Astana qalasynda qoiylǵan miýzikl jańa oblys ortalyǵynda tuńǵysh ret sahnalanýda. Eki kórinisten turatyn týyndy teatr repertýaryndaǵy úzdik qoiylymdardyń birine ainalaryna senimim kámil. Rýhani qundylyǵy mol mundai dúnielerdiń jandanýyna qoldaý bildirip, nasihattalýyn qolǵa alýymyz qajet. Sondyqtan da til men ultqa bólinbeitin kieli óner ulandarynyń ónerin shetelge tanytýdy da basty nazarǵa alyp, elimizdiń mereiin osy arqyly asqaqtatýǵa qadam jasaýǵa bolady. Ulttyq ónerdi damytýǵa úles qosyp halyqtyń alǵysyna bólený jolyndaǵy eńbekterińiz eselene bersin, – dedi aimaq basshysy Janseiit Qanseiituly.
Basty keiipkerlerdi somdaǵandar Áigerim Jumabek, Mádihan Dúiseev, Aibek Qanatbek, Kúnaiym Ismailova, Aidar Baiymbetov, Marjan Sháriphan, Baqytjan Tursymanov syndy teatrdyń jas ári tájiribeli ártisteri. Talantymen talaidy tánti etken ónerpazdardyń ónerine óńir basshysy óz rizashylyǵyn bildirdi.
Jalpy mahabbat lirikasy beinelengen týyndyny sahnalaýǵa teatrdyń 60-tan astam ártisi kúsh saldy. Adaldyq pen batyldyq, qyzǵanysh pen kúres kórinisteri sýrettelgen qoiylym kórermender kóńilinen shyǵyp, zor qoshemetke ie boldy.
Túrkistan oblysy ákiminiń baspasóz qyzmeti
