«Qazaqstan máslihattary depýtattarynyń birlestigi» respýblikalyq qoǵamdyq birlestigi jáne Túrkistan oblystyq máslihaty uiymdastyrǵan jiynda QR Prezidenti Qasym-Jomart Toqaevtyń «Jańa Qazaqstan: Jańarý men jańǵyrý joly» atty Qazaqstan halqyna Joldaýyn júzege asyrý joldary sóz boldy.
Jiyndy «Qazaqstan máslihattary depýtattarynyń birlestigi» respýblikalyq qoǵamdyq birlestiginiń tóraǵasy Tóleýbek Muqashev júrgizip otyrdy.
Túrkistan oblysynyń ákimi Ómirzaq Shókeev Memleket basshysy tarapynan óńirge jaqsy kóńil bólinip jatqanyn, Túrkistan – birlik pen tatýlyqtyń ortalyǵy retinde damitynyn tilge tiek etti. El birligin nyǵaitýda Túrkistan tájiribesi joǵary baǵalanǵanyn atap ótti. Joldaýdaǵy basym baǵyttarǵa toqtalyp, oblystyń damý barysymen tanystyrdy.
– Úsh jyldam astam ýaqyt ishinde Túrkistan óńiri jaqsy damydy. Jalpy óńirlik ónim kólemi 2,5 esege artty. Oblysta munai óńdeý zaýyty jáne ózge de aýqymdy jobalar qolǵa alynyp, qurylysy júrip jatyr. Aýyl sharýashylyǵyn ártaraptandyrý, jańa tehnologiialardy engizý, jańbyrlatyp, tamshylatyp sýǵarý arqyly ónim kólemi arta tústi. Jylyna 40 myńdai jumys ornyn ashý mejesi qoiylyp, bul júzege asý ústinde. Taǵy bir aita keterligi, qurylys salasynda buryn-sońdy bolmaǵan kórsetkishke qol jetkizildi.
«Kongress-holl» keshenindegi jiynda Túrkistan oblystyq máslihatynyń hatshysy Qairat Balabiev, «Amanat» partiiasy Túrkistan oblystyq filialynyń atqarýshy hatshysy Beisen Tájibaev jáne óńirlerden kelgen máslihat hatshylary baiandama jasap, óz pikirlerin bildirdi.
Elimizdiń túkpir-túkpirinen kelgen máslihat hatshylary men depýtattary Túrkistan qalasynyń sáýleti artyp, jańa qalaǵa ainalǵanyna toqtaldy. Túrkistan óńirindegi oń ózgeristerdi joǵary baǵalady.
