«قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگى جانە تۇركىستان وبلىستىق ءماسليحاتى ۇيىمداستىرعان جيىندا ق ر پرەزيدەنتى قاسىم-جومارت توقايەۆتىڭ «جاڭا قازاقستان: جاڭارۋ مەن جاڭعىرۋ جولى» اتتى قازاقستان حالقىنا جولداۋىن جۇزەگە اسىرۋ جولدارى ءسوز بولدى.
جيىندى «قازاقستان ءماسليحاتتارى دەپۋتاتتارىنىڭ بىرلەستىگى» رەسپۋبليكالىق قوعامدىق بىرلەستىگىنىڭ ءتوراعاسى تولەۋبەك مۇقاشيەۆ جۇرگىزىپ وتىردى.
تۇركىستان وبلىسىنىڭ اكىمى ءومىرزاق شوكەيەۆ مەملەكەت باسشىسى تاراپىنان وڭىرگە جاقسى كوڭىل ءبولىنىپ جاتقانىن، تۇركىستان – بىرلىك پەن تاتۋلىقتىڭ ورتالىعى رەتىندە داميتىنىن تىلگە تيەك ەتتى. ەل بىرلىگىن نىعايتۋدا تۇركىستان تاجىريبەسى جوعارى باعالانعانىن اتاپ ءوتتى. جولداۋداعى باسىم باعىتتارعا توقتالىپ، وبلىستىڭ دامۋ بارىسىمەن تانىستىردى.
– ءۇش جىلدام استام ۋاقىت ىشىندە تۇركىستان ءوڭىرى جاقسى دامىدى. جالپى وڭىرلىك ءونىم كولەمى 2،5 ەسەگە ارتتى. وبلىستا مۇناي وڭدەۋ زاۋىتى جانە وزگە دە اۋقىمدى جوبالار قولعا الىنىپ، قۇرىلىسى ءجۇرىپ جاتىر. اۋىل شارۋاشىلىعىن ءارتاراپتاندىرۋ، جاڭا تەحنولوگيالاردى ەنگىزۋ، جاڭبىرلاتىپ، تامشىلاتىپ سۋعارۋ ارقىلى ءونىم كولەمى ارتا ءتۇستى. جىلىنا 40 مىڭداي جۇمىس ورنىن اشۋ مەجەسى قويىلىپ، بۇل جۇزەگە اسۋ ۇستىندە. تاعى ءبىر ايتا كەتەرلىگى، قۇرىلىس سالاسىندا بۇرىن-سوڭدى بولماعان كورسەتكىشكە قول جەتكىزىلدى.
بىلتىر 700 مىڭ شارشى مەتردەن استام ءۇي بەرىلدى. ءبىر تۇركىستان قالاسىنىڭ وزىندە 15 مىڭداي پاتەر سالىنىپ، 100 مىڭ تۇرعىنعا ساي پاتەر مەن ينفراقۇرىلىم جاساقتالىپ وتىر. تۇركىستان قالاسىنداعى ۇيلەردىڭ 90 پايىزىنا گاز بەرىلدى. ەكولوگيا جاقساردى. سۋ كانالدارى بەتوندالىپ، جاڭا سۋ قويمالار پايدالانۋعا بەرىلىپ جاتىر. مىنە، وسى جوبالار ارقىلى تۇركىستاننىڭ ەكولوگياسى جاقسارىپ، جاسىل قالاعا اينالادى دەگەن سەنىم مول. بارلىق سالاداعى جۇمىستار جالعاسىن تابا بەرەدى. بۇنىڭ ءبارى – ەل بىرلىگىنىڭ، اتقارۋشى ورگان مەن ءماسليحاتتاردىڭ بىرلەسكەن جۇمىسىنىڭ جەمىسى، – دەگەن ءومىرزاق شوكەيەۆ ءماسليحات حاتشىلارىمەن پىكىر الماسىپ، جولداۋداعى باعىتتاردى سارالادى.
«كونگرەسس-حولل» كەشەنىندەگى جيىندا تۇركىستان وبلىستىق ءماسليحاتىنىڭ حاتشىسى قايرات بالابييەۆ، «Amanat» پارتياسى تۇركىستان وبلىستىق فيليالىنىڭ اتقارۋشى حاتشىسى بەيسەن تاجىبايەۆ جانە وڭىرلەردەن كەلگەن ءماسليحات حاتشىلارى بايانداما جاساپ، ءوز پىكىرلەرىن ءبىلدىردى.
ەلىمىزدىڭ تۇكپىر-تۇكپىرىنەن كەلگەن ءماسليحات حاتشىلارى مەن دەپۋتاتتارى تۇركىستان قالاسىنىڭ ساۋلەتى ارتىپ، جاڭا قالاعا اينالعانىنا توقتالدى. تۇركىستان وڭىرىندەگى وڭ وزگەرىستەردى جوعارى باعالادى.
