Túrkistan oblysynda turǵyndardy baspanamen qamtý baǵytynda aýqymdy jumystar atqarylyp jatyr. Búgin Túrkistan qalasynda turǵyn úi kezeginde turǵan áleýmettik osal toptaǵy azamattarǵa 88 páter kilti tabystaldy. Turǵyndardyń qýanyshyn bólisýge Túrkistan oblysynyń ákimi Darhan Satybaldy arnaiy baryp, páter ielerine izgi nietin bildirdi.
– Búgin sizdermen erekshe qýanyshty sátte kezdesip turmyz. Ózderińiz bilesizder, Túrkistan oblysy qurylyp, Túrkistan qalasynyń oblys ortalyǵy atanǵanyna 6 jyl toldy. Osy aitýly mereke aiasynda búgingi is-sharany josparlaǵan bolatynbyz. Bul úilerdi kásipkerler naryqqa satamyz dep salǵan bolatyn.
Biz biýdjetten qarjy taýyp, kásipkerlermen kelisip, úilerdiń baǵasyn tómendetip, arnaiy satyp aldyq. Sóitip shahardaǵy muqtaj azamattarǵa berý týraly sheshim qabyldadyq. Kórip tursyzdar, úiler men aýlasy óte yńǵaily, ádemi. Ainalasyn taza ustaý óz qoldaryńyzda. Sizdermen birge ózimiz úi alǵandai qýanyp jatyrmyz. Bul jumystar Memleket basshysy Qasym-Jomart Kemelulynyń turǵyndardy baspanamen qamtý tapsyrmasy aiasynda atqarylyp otyr. Shańyraqtaryńyz berekeli ári baqytqa, shattyqqa toly bolsyn! – dedi Darhan Satybaldy.
Elitaly bolyp sanalatyn úsh qabatty «Iassaýi» turǵyn úi kesheniniń aýmaǵynda balalar oiyn alańshasy, kólik turaǵy bar jáne infraqurylymmen tolyq qamtamasyz etilgen.
Oblys ortalyǵynda turǵyn úi keshenderiniń qurylysy jalǵasyp jatyr. Biyl biýdjet esebinen 41, jeke investorlar esebinen 24 kópqabatty turǵyn úi salý kózdelgen.
Sonymen qatar osy jyly jalpy 191 úi salý jospary bekitildi. Búginde 159 turǵyn úidiń qurylysy júrgizilip jatyr. Olardy jyl sońyna deiin paidalanýǵa berý josparlanǵan. Jalpy, Túrkistan qalasy halyqty baspanamen qamtý baǵytynda elimizde aldyńǵy qatarda. Oblys ortalyǵynda sońǵy 5 jylda turǵyn úi kezeginde turǵan 2558 azamat baspanaly boldy.
Sonymen birge búgin Túrkistan qalasynda «Jastar ortalyǵynyń» jańa ǵimaraty paidalanýǵa berildi. Saltanatty sharaǵa qatysqan Túrkistan oblysynyń ákimi Darhan Satybaldy túrkistandyq jastarǵa zamanaýi ortalyqtyń kiltin tabystap, ár bastamalaryna sáttilik tiledi.
Jastar ortalyǵyna arnalǵan bul nysan jergilikti biýdjet esebinen boi kóterdi. Sáýleti men saltanaty kelisken ǵimarat táýligine 100-den asa jasqa qyzmet kórsetedi. Onda jastarǵa bilimin kóterip, salaýatty ómir saltyn ustanýǵa, shyǵarmashylyqpen ainalysýǵa barlyq jaǵdai jasalǵan.
Ortalyq arnaiy demalys aimaǵy, strit-vorkaýt alańy, elektrondy kitaphana bólmesi, úiirmelerge arnalǵan bólmeler, shaǵyn sportzal jáne kópfýnktsionaldy zaldarymen qamtamasyz etilgen. Eriktilerge arnaiy úlken zal men kinoteatr da qarastyrylǵan. Aita keteiik, Túrkistan qalasynda 14-35 jas aralyǵynda 71 486 jas bar. Qaladaǵy 2 joǵarǵy oqý orynda 12 265 stýdent bilim alyp jatyr.
