تۇركىستان وبلىسىندا تۇرعىنداردى باسپانامەن قامتۋ باعىتىندا اۋقىمدى جۇمىستار اتقارىلىپ جاتىر. بۇگىن تۇركىستان قالاسىندا تۇرعىن ءۇي كەزەگىندە تۇرعان الەۋمەتتىك وسال توپتاعى ازاماتتارعا 88 پاتەر كىلتى تابىستالدى. تۇرعىنداردىڭ قۋانىشىن بولىسۋگە تۇركىستان وبلىسىنىڭ اكىمى دارحان ساتىبالدى ارنايى بارىپ، پاتەر يەلەرىنە ىزگى نيەتىن ءبىلدىردى.
– بۇگىن سىزدەرمەن ەرەكشە قۋانىشتى ساتتە كەزدەسىپ تۇرمىز. وزدەرىڭىز بىلەسىزدەر، تۇركىستان وبلىسى قۇرىلىپ، تۇركىستان قالاسىنىڭ وبلىس ورتالىعى اتانعانىنا 6 جىل تولدى. وسى ايتۋلى مەرەكە اياسىندا بۇگىنگى ءىس-شارانى جوسپارلاعان بولاتىنبىز. بۇل ۇيلەردى كاسىپكەرلەر نارىققا ساتامىز دەپ سالعان بولاتىن.
ءبىز بيۋدجەتتەن قارجى تاۋىپ، كاسىپكەرلەرمەن كەلىسىپ، ۇيلەردىڭ باعاسىن تومەندەتىپ، ارنايى ساتىپ الدىق. ءسويتىپ شاھارداعى مۇقتاج ازاماتتارعا بەرۋ تۋرالى شەشىم قابىلدادىق. كورىپ تۇرسىزدار، ۇيلەر مەن اۋلاسى وتە ىڭعايلى، ادەمى. اينالاسىن تازا ۇستاۋ ءوز قولدارىڭىزدا. سىزدەرمەن بىرگە ءوزىمىز ءۇي العانداي قۋانىپ جاتىرمىز. بۇل جۇمىستار مەملەكەت باسشىسى قاسىم-جومارت كەمەل ۇلىنىڭ تۇرعىنداردى باسپانامەن قامتۋ تاپسىرماسى اياسىندا اتقارىلىپ وتىر. شاڭىراقتارىڭىز بەرەكەلى ءارى باقىتقا، شاتتىققا تولى بولسىن! – دەدى دارحان ساتىبالدى.
ەليتالى بولىپ سانالاتىن ءۇش قاباتتى «ياسساۋي» تۇرعىن ءۇي كەشەنىنىڭ اۋماعىندا بالالار ويىن الاڭشاسى، كولىك تۇراعى بار جانە ينفراقۇرىلىممەن تولىق قامتاماسىز ەتىلگەن.
وبلىس ورتالىعىندا تۇرعىن ءۇي كەشەندەرىنىڭ قۇرىلىسى جالعاسىپ جاتىر. بيىل بيۋدجەت ەسەبىنەن 41، جەكە ينۆەستورلار ەسەبىنەن 24 كوپقاباتتى تۇرعىن ءۇي سالۋ كوزدەلگەن.
سونىمەن قاتار وسى جىلى جالپى 191 ءۇي سالۋ جوسپارى بەكىتىلدى. بۇگىندە 159 تۇرعىن ءۇيدىڭ قۇرىلىسى جۇرگىزىلىپ جاتىر. ولاردى جىل سوڭىنا دەيىن پايدالانۋعا بەرۋ جوسپارلانعان. جالپى، تۇركىستان قالاسى حالىقتى باسپانامەن قامتۋ باعىتىندا ەلىمىزدە الدىڭعى قاتاردا. وبلىس ورتالىعىندا سوڭعى 5 جىلدا تۇرعىن ءۇي كەزەگىندە تۇرعان 2558 ازامات باسپانالى بولدى.
سونىمەن بىرگە بۇگىن تۇركىستان قالاسىندا «جاستار ورتالىعىنىڭ» جاڭا عيماراتى پايدالانۋعا بەرىلدى. سالتاناتتى شاراعا قاتىسقان تۇركىستان وبلىسىنىڭ اكىمى دارحان ساتىبالدى تۇركىستاندىق جاستارعا زاماناۋي ورتالىقتىڭ كىلتىن تابىستاپ، ءار باستامالارىنا ساتتىلىك تىلەدى.
جاستار ورتالىعىنا ارنالعان بۇل نىسان جەرگىلىكتى بيۋدجەت ەسەبىنەن بوي كوتەردى. ساۋلەتى مەن سالتاناتى كەلىسكەن عيمارات تاۋلىگىنە 100-دەن اسا جاسقا قىزمەت كورسەتەدى. وندا جاستارعا ءبىلىمىن كوتەرىپ، سالاۋاتتى ءومىر سالتىن ۇستانۋعا، شىعارماشىلىقپەن اينالىسۋعا بارلىق جاعداي جاسالعان.
ورتالىق ارنايى دەمالىس ايماعى، ستريت-ۆوركاۋت الاڭى، ەلەكتروندى كىتاپحانا بولمەسى، ۇيىرمەلەرگە ارنالعان بولمەلەر، شاعىن سپورتزال جانە كوپفۋنكسيونالدى زالدارىمەن قامتاماسىز ەتىلگەن. ەرىكتىلەرگە ارنايى ۇلكەن زال مەن كينوتەاتر دا قاراستىرىلعان. ايتا كەتەيىك، تۇركىستان قالاسىندا 14-35 جاس ارالىعىندا 71 486 جاس بار. قالاداعى 2 جوعارعى وقۋ ورىندا 12 265 ستۋدەنت ءبىلىم الىپ جاتىر.
