– Jańadan salynǵan «Turkistan Arena» alańynda alǵash ret osyndai iri oiyn ótýde. Biz úshin bul úlken mártebe. Túrkistan oblysynyń namysyn bairaqty básekede qorǵaityn «Turan» komandasy jasaqtaldy. Jergilikti úzdik fýtbolshylardan quralǵan komanda jasyl alańda jeńiske jetetinine kámil senemin. Oblysta jasóspirimderdi osy sport túrine kásibi túrde baýlityn fýtbol mektebi jumys jasaýda.
Qurmetti komandalar, biylǵy Sýperkýbok oiyndarynyń Ulystyń uly kúni Naýryz merekesimen qatar kelýi Túrkistan qalasynyń tórinde óner kórsetýi úlken jaýapkershilikti talap etedi. Túrki jurty kóz tikken qasietti shaharǵa basqan qadamdaryńyz qut bolsyn», – dedi oblys ákimi óz sózinde.
Kúni keshe elordanyń «Astana» fýtbol klýby men Qaraǵandynyń «Shahter» komandasy aqtyq synǵa joldama úshin talasqan bolatyn. Nátijesinde astanalyqtar 2:0 esebimen jeńiske jetip, sýperkýbok finalyna joldama aldy.
Búginde jasyl alańda almatylyq «Qairat» pen qostanailyq «Tobyl» kezdesip, tartysty oiyn ótkizdi. Oiynnyń negizgi ýaqytynda oiyn 3:3 esebimen teń aiaqtaldy. Penalti seriiasynda qostanailyq «Tobyl» komandasynyń joly bolyp, 4:2 esebimen jeńiske jetti. Esterińizge sala ketsek, 5 naýryz kúni úshinshi oryn úshin Qaraǵandynyń «Shahteri» men Almatynyń «Qairat» komandasy talasady. Al, 6 naýryz kúni Sýperkýbok úshin aqtyq básekede elordalyq «Astana» komandasy men Qostanaidyń «Tobyly» tartysqa toly oiyndy ótkizetin bolady. Barlyq matchtar kórermendersiz ótedi. Týrnirdiń júlde qory 42 mln teńgeni quraidy. Týrnir jeńimpazy 25 mln teńgege ie bolady.
