Túrkistanda Qarjylyq monıtorıń agenttiginiń úılestirýimen, Túrkistan oblysy boıynsha Ekonomıkalyq tergep-tekserý departamentiniń uıymdastyrýymen «Zań men tártip. Ekonomıkalyq qaýipsizdik: «Qarjylyq saýattylyqty arttyrý jáne táýeldilikpen kúres» respýblıkalyq forýmy ótip jatyr, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Forýmnyń maqsaty – halyq arasynda qarjylyq monıtorıń organdarynyń oń ımıjin qalyptastyrý, «AML ACADEMY» qarjylyq monıtorıń akademıasynyń áleýetin kóterý, halyqtyń qarjylyq saýattylyǵyn arttyrý, jastar arasynda quqyqtyq aqparattyq sıfrlyq mádenıetin qalyptastyrý, oıynqumarlyqpen qarjylyq pıramıdalardyń aldyn-alý jáne kıbergıgıenany saqtaý ádetin qalyptastyrý.
Forýmǵa qala ákimi, QR Qarjylyq monıtorıń agenttiginiń ókilderi, quqyq qorǵaý organdarynyń qyzmetkerleri, jergilikti máslıhat depýtattary, qoǵam belsendileri, joǵarǵy jáne orta arnaýly oqý oryndarynyń stýdentteri, qoǵamdyq pikir kóshbasshylary, sportshylar, «Jastar resýrstyq ortalyqtary», Ekonomıkalyq tergep-tekserý qyzmetiniń volonterlary, QR Mádenıet qaıratkerleri, tanymal kıno jáne teatr juldyzdary, medıa tulǵalar, oqytýshy-professorlar, din ókilderi qatysty.
Atalǵan forým aıasynda fleshmob, paneldik sesıalar ıntellektýaldy oıyn jáne Gala-konsert ótkiziledi. Fleshmob Túrkistan qalasynyń Ákimshilik-iskerlik ortalyǵy, O.Jarylqapov atyndaǵy ortalyq stadıon, Q.A.Iasaýı atyndaǵy halyqaralyq qazaq-túrik ýnıversıteti jáne Halyqaralyq týrızm jáne meımandostyq ýnıversıtetterinde uıymdastyryldy.
Forýmda Túrkistan oblysy ákiminiń orynbasary Ertaı Altaev pen Túrkistan oblysy boıynsha Ekonomıkalyq tergep-tekserý departamentiniń basshysy Erbolat Balǵabaev sóz sóılep, jastardy jat ádetterden aýlaq bolýǵa shaqyrdy.
Túrkistan oblysy aýmaǵynda ornalasqan 1000 mektep jáne 50 kolejdiń 500 myńnan astam shákirti bir mezette ózderiniń lýdomanıa jáne sıntetıkalyq esirtkige qarsy ekenderin jetkizip, chellendjdi elimizdiń ózge óńirlerine joldady.
Forým sońynda Túrkistan oblysynyń ekonomıkalyq qaýipsizdigin saqtaýda eleýli eńbek etken azamattarǵa alǵys hattar men arnaıy syılyqtar tabystalady.
