Klımaty qurǵaq Túrkistanda jasyl jelekti jetildirýdiń asa qıyndyǵyn aıtqan sala maıtalmandary óńirde atqarylǵan qajyrly eńbekke oń baǵalaryn berdi. Eki jylǵy eńbekti damytý úshin ózara tájirıbe almasyp, oı bólisti, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Túrkistan qalasynda ótken halyqaralyq ǵylymı-praktıkalyq konferensıada «Qalalardyń jasyl aımaǵy, jasyl jelekterdi kútip ustaý jáne damytý perspektıvalary» atty qarar qabyldandy. Shara el Táýelsizdiginiń 30 jyldyǵyna oraılastyrylǵan.

Túrkistan oblysy ákimdiginiń, ekologtar men halyqaralyq deńgeıdegi sarapshylardyń basyn qosqan jıynda Túrkistan óńiriniń jasyl aımaǵyn kútip ustaý, baptaý jáne kólemin ulǵaıtý máselesi talqylandy.

Mańyzdy sharada mamandar bir aýyzdan Túrkistanda tek óńirdiń topyraqtyq – klımattyq jaǵdaıyna beıimdelgen aǵashtardy otyrǵyzý týraly toqtamǵa keldi. Oblys ortalyǵyndaǵy jasyl beldeý aýmaǵynda qaraaǵash, akasıa, úıeńki kóshetteri egilgen.

Túrkistan qalasynyń jasyl beldeýi aýmaǵynda orman daqyldaryn damytý úshin «Jasyl aımaq» KMM bazasynda seleksıalyq negizde orman tuqymy aýmaǵyn qalyptastyrý, pıtomnık sharýashylyǵyn keńeıtý qajet.

Búgingi tańda jasyl aýmaqtyń kólemin keńeıtip, eldi mekenderdi kógaldandyrý jáne olardyń aınalasynda jasyl aımaqtar qurý máselesi basymdyq berilgen baǵyttardyń biri. Jıynda qoıylǵan mindetterdi iske asyrýdy ǵylymı jetistikter negizinde júzege asyrý qajettigi aıtyldy. Bul tusta «Á.N. Bókeıhan atyndaǵy Qazaq orman sharýashylyǵy jáne agroormanmelıorasıa ǵylymı-zertteý ınstıtýty» mańyzdy ról atqarmaq.



Basqosýǵa arnaıy qatysqan Tashkent memlekettik agrarlyq ýnıversıtetiniń ǵalymdary tájirıbe bólisip, aýa-raıy qolaısyz aýmaqta aǵashtardy baptaýdyń qyr-syrymen bólisti. Jasyl aımaqty jetildirý jumysyna jańa serpin bergen jıyn qorytyndysy boıynsha qarar qabyldandy. Osy tujyrymdama aıasynda jumystar jalǵasady. Qazirgi ýaqytta Túrkistan qalasynyń jasyl aımaǵynda 7700 ga jerge 12 mlnǵa jýyq kóshet otyrǵyzylǵan. Jasyl aımaq kólemi eki ese artady.