Túrkistan qalasynda ótken halyqaralyq ǵylymi-praktikalyq konferentsiiada «Qalalardyń jasyl aimaǵy, jasyl jelekterdi kútip ustaý jáne damytý perspektivalary» atty qarar qabyldandy. Shara el Táýelsizdiginiń 30 jyldyǵyna orailastyrylǵan.
Túrkistan oblysy ákimdiginiń, ekologtar men halyqaralyq deńgeidegi sarapshylardyń basyn qosqan jiynda Túrkistan óńiriniń jasyl aimaǵyn kútip ustaý, baptaý jáne kólemin ulǵaitý máselesi talqylandy.
Túrkistan qalasynyń jasyl beldeýi aýmaǵynda orman daqyldaryn damytý úshin «Jasyl aimaq» KMM bazasynda selektsiialyq negizde orman tuqymy aýmaǵyn qalyptastyrý, pitomnik sharýashylyǵyn keńeitý qajet.
Búgingi tańda jasyl aýmaqtyń kólemin keńeitip, eldi mekenderdi kógaldandyrý jáne olardyń ainalasynda jasyl aimaqtar qurý máselesi basymdyq berilgen baǵyttardyń biri. Jiynda qoiylǵan mindetterdi iske asyrýdy ǵylymi jetistikter negizinde júzege asyrý qajettigi aityldy. Bul tusta «Á.N. Bókeihan atyndaǵy Qazaq orman sharýashylyǵy jáne agroormanmelioratsiia ǵylymi-zertteý institýty» mańyzdy ról atqarmaq.
Basqosýǵa arnaiy qatysqan Tashkent memlekettik agrarlyq ýniversitetiniń ǵalymdary tájiribe bólisip, aýa-raiy qolaisyz aýmaqta aǵashtardy baptaýdyń qyr-syrymen bólisti. Jasyl aimaqty jetildirý jumysyna jańa serpin bergen jiyn qorytyndysy boiynsha qarar qabyldandy. Osy tujyrymdama aiasynda jumystar jalǵasady. Qazirgi ýaqytta Túrkistan qalasynyń jasyl aimaǵynda 7700 ga jerge 12 mlnǵa jýyq kóshet otyrǵyzylǵan. Jasyl aimaq kólemi eki ese artady.
