تۇركىستان قالاسىندا وتكەن حالىقارالىق عىلىمي-پراكتيكالىق كونفەرەنسيادا «قالالاردىڭ جاسىل ايماعى، جاسىل جەلەكتەردى كۇتىپ ۇستاۋ جانە دامىتۋ پەرسپەكتيۆالارى» اتتى قارار قابىلداندى. شارا ەل تاۋەلسىزدىگىنىڭ 30 جىلدىعىنا ورايلاستىرىلعان.
تۇركىستان وبلىسى اكىمدىگىنىڭ، ەكولوگتار مەن حالىقارالىق دەڭگەيدەگى ساراپشىلاردىڭ باسىن قوسقان جيىندا تۇركىستان ءوڭىرىنىڭ جاسىل ايماعىن كۇتىپ ۇستاۋ، باپتاۋ جانە كولەمىن ۇلعايتۋ ماسەلەسى تالقىلاندى.
ماڭىزدى شارادا ماماندار ءبىر اۋىزدان تۇركىستاندا تەك ءوڭىردىڭ توپىراقتىق – كليماتتىق جاعدايىنا بەيىمدەلگەن اعاشتاردى وتىرعىزۋ تۋرالى توقتامعا كەلدى. وبلىس ورتالىعىنداعى جاسىل بەلدەۋ اۋماعىندا قارااعاش، اكاسيا، ۇيەڭكى كوشەتتەرى ەگىلگەن.
تۇركىستان قالاسىنىڭ جاسىل بەلدەۋى اۋماعىندا ورمان داقىلدارىن دامىتۋ ءۇشىن «جاسىل ايماق» كمم بازاسىندا سەلەكسيالىق نەگىزدە ورمان تۇقىمى اۋماعىن قالىپتاستىرۋ، پيتومنيك شارۋاشىلىعىن كەڭەيتۋ قاجەت.
بۇگىنگى تاڭدا جاسىل اۋماقتىڭ كولەمىن كەڭەيتىپ، ەلدى مەكەندەردى كوگالداندىرۋ جانە ولاردىڭ اينالاسىندا جاسىل ايماقتار قۇرۋ ماسەلەسى باسىمدىق بەرىلگەن باعىتتاردىڭ ءبىرى. جيىندا قويىلعان مىندەتتەردى ىسكە اسىرۋدى عىلىمي جەتىستىكتەر نەگىزىندە جۇزەگە اسىرۋ قاجەتتىگى ايتىلدى. بۇل تۇستا «ءا.ن. بوكەيحان اتىنداعى قازاق ورمان شارۋاشىلىعى جانە اگروورمانمەليوراسيا عىلىمي-زەرتتەۋ ينستيتۋتى» ماڭىزدى ءرول اتقارماق.
باسقوسۋعا ارنايى قاتىسقان تاشكەنت مەملەكەتتىك اگرارلىق ۋنيۆەرسيتەتىنىڭ عالىمدارى تاجىريبە ءبولىسىپ، اۋا-رايى قولايسىز اۋماقتا اعاشتاردى باپتاۋدىڭ قىر-سىرىمەن ءبولىستى. جاسىل ايماقتى جەتىلدىرۋ جۇمىسىنا جاڭا سەرپىن بەرگەن جيىن قورىتىندىسى بويىنشا قارار قابىلداندى. وسى تۇجىرىمداما اياسىندا جۇمىستار جالعاسادى. قازىرگى ۋاقىتتا تۇركىستان قالاسىنىڭ جاسىل ايماعىندا 7700 گا جەرگە 12 ملنعا جۋىق كوشەت وتىرعىزىلعان. جاسىل ايماق كولەمى ەكى ەسە ارتادى.
